Martxoaren 8ko Emakumeen Nazioarteko Egunaren inguruan, datorren asterako hainbat ekitaldi antolatu ditu Leioako Bilgune Feministak. Ostegunean, hilak 7, "Emakumeok lan gatazketan" izenburuko mahai-ingurua egingo dute 19:30ean, Sakoneta kiroldegiko hitzaldi aretoan. Marian Verde Firestoneko langile ohia, Lorea Ureta Etxeko Langileen Elkarteko kidea eta Maite Agirre zein Gotzone Etxeberria eskola jantokietako langileak izango dira hizlariak. Gainera, haurtzaindegi zerbitzua ere egongo da, Leioako BFek jakinarazi duenez. Emakumeen Nazioarteko Egunerako, berriz, argazki txapelketako erakusketa (arratsalde osoan), kontzentrazioa (20:00) eta, ondoren, argazki txapelketako sari banaketa egingo dituzte Bulebarrean. Egunari amaiera emateko, 20:30etik aurrera, poteo musikatua izango da Leioako kaleetan zehar. Amaitzeko, larunbatean, hilak 9, mural herrikoia egingo dute, 11:00etan. Argazkian, 2011ko abenduaren 13an, Leioako Bilgune Feministak eta Andrak emakumeen elkarteak deituta, "Emakumeon aurkako erasorik ez!" aldarrikatu zuten 120 bat emakumek eta gizonek.
Argazki txapelketari dagokionez, gaia "Martxoak 8, emakume langilearen eguna" izango da eta lanak aurkezteko egunak martxoaren 5 edo 6a izango dira, ondoko helbide elektronikoa baliatuz: leioakobilgunefeminista[abildua]hotmail.com. Leioako Bilgune Feministak zehaztu duenez, ezin izango dira bi argazki baino gehiago aurkeztu. Sari banaketa ostiralean izango da, 20:00etan, Bulebarrean. Irabazleak bi pertsonentzako bazkaria eskuratuko du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun