Urdulizko Iparralde frontoiak Berasaluze VIII-Albisu eta Ezkurdia-Zubieta bikoteen arteko dema hartuko du bihar, ostirala. Bertatik zuzenean ikusteaz gain, Eitb.com-en zein ETB1-en jarraitzeko aukera izango da, gaueko 10etatik aurrera. Iparraldeko ezker pareta finalerdietarako lehia sutsuaren lekukoa izango da, lau pilotariek jokoan izango baitute Binakako Txapelketaren laugarren postua, hurrengo faserako sailkatzeko azken tokia. Hamaikagarren jardunaldiko partidaren garrantziaz jabetuta, materialak probatu zituzten atzo, Iparralden. Ezkurdiak adierazi duenez, Urdulizko partida "txapelketan ditugun helburuetarako nahitaezkoa da. Hil edo biziko partida da. Berasaluze VIII eta Albisuri irabazi behar diegu, datorren astean Titin III eta Merino II-aren aurrean izango dugun partidara aukerekin heltzeko". Izan ere, bosgarren daude sailkapenean Pablo Berasaluze eta Jon Ander Albisu. Urdulizko saioa Mendizabal III - Merino eta Elezkano II - Larunberen arteko partidaz osatuko da. Argazkian, Berasaluze VIII / © Asegarce.
Asegarce eta Aspek antolatutako txapelketaren beste hitzorduak larunbatean (Xala-Barriola vs. Bengoetxea VI-Beroiz, Iruñean, 17:00etan) eta igandean izango dira. Egun horretan, Bilbon arituko dira Irujo-Zabaleta vs. Olaizola II-Zabala eta Logroñon Titín III-Merino II vs. Arretxe II-Begino, guztiak arratsaldeko 5etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun