Orain gutxi jardunaldi teknikoa egin dute Faduran Udalak eta tokiko ikastetxeek, Getxoren egoera ekologikoa eta herritarren eguneroko ekintzek ingurunean duten eragina aztertzeko asmoz. Aurten ere Eskolako Agenda 21en parte hartzen duten 11 hezkuntza zentroetako ikasleek diagnostikoa burutu dute Ingurumen Aretoan, herriaren mugikortasuna, energia, elikadura eta hondakinen inguruan. Azterketa abiapuntutzat hartuta, ikasle getxoztarrek daukaten zeregina, "aztarna ekologikoa" murrizteko plan egoki bat prestatzeko ideiak bilatzea izango da. Horretarako, lehenago hainbat galderei erantzun beharko dizkiete. Horietako bat litzateke honako hau: "Zein azalera beharko litzateke Getxon kontsumitzen ditugun baliabideak ekoiztu eta sortzen ditugun hondakinak bereganatzeko?". Hain zuzen, jardunaldian mahaigaineratu zuten galderetako bat izan zen, udal iturriek zehaztu dutenez. Argazkian, Imanol Landa Getxoko alkateak eta Eskolako Agenda 21 ekimenean parte hartzen duten herriko 11 ikastetxetako ikasleek urtero egiten dute batzarra udaletxean / © Getxoko Udala.
Batzarran, ingurumen hezitzaile, ikasle, irakasle eta udal teknikariek beren ezaguerak eskaini eta esperientziak partekatu zituzten: natura errespetatu eta baloratzeko zenbait aholku eman zituzten; Getxoko landa eredua, "desagertzeko bidean dena", berreskuratzearen alde egiteaz hitz egin zuten; eta ikastetxera zein lantokira joateko bizikleta erabiltzeaz ere, besteak beste. Udaleko ingurumen teknikari batek, aurreko ikasturtean ikasle getxoztarrek Udal Ingurumen Forora eraman zituzten proposamenak ezartzeko tokiko erakundea egiten ari den lana azaldu zuen. Proposamen horietako batzuk dira: eraikinak egiteko landa guneak ez suntsitzea, baratza ekologikoak sustatzea, bidegorri gehiago ezartzea eta Galeako txilardia eta Korridore Berdea babestea. Eskolako Agenda 21en parte hartzen duten ikastetxe guztiak laster elkartuko dira berriro, ikasturtean egin duten lana partekatu eta maiatzaren 30eko Udal Foroan aurkeztuko dituzten konpromiso eta proposamenak adosteko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun