Getxoko Udala eta bere erakunde autonomoak Innobasque Berrikuntzaren Euskal Agentziak duen entitate laguntzaileen sarean sartzeko hitzarmena sinatu dute gaur Imanol Landa alkateak eta Jose Maria Villate aipatu erakunde horretako zuzendari nagusiak. Agintari getxoztarrak esan duenez “udal estrategiaren barruan udalerri dinamikoa eta berritzailea sortzeko garrantzi handiko ituna da”. Akordioa Getxolanen egoitza berrian sinatu dute, Areetan, "bertako ekonomia sustapenaren dinamismoan eta berrikuntzan udal bultzada horren ikurra den egoitzan". Hitzarmenak "Euskadiko berrikuntza sare garrantzitsuenean" parte hartzea ahalbidetuko du, udal arduradunek zehaztu dutenez. Mila elkarte baino gehiago atxikituta ditu sareak. "Horrela, Getxoko proiektuak eta enpresak modu nabariagoan agertuko dira; kontaktuen sarea zabalduko da; dinamizazioa areagotuko da eta komunikaziorako kanalak indartuko dira, besteak beste", azaldu dutenez. Argazkian, Udaleko eta Innobasqueko ordezkariak gaurko ekitaldian / © Getxoko Udala.
"Innobasque entitate estrategikoa da, eta berrikuntzarako sistemaren jarraipena eta ebaluazioa egiteko tresna iraunkorra izatea du helburu, eragile publiko eta pribatuen artean guneak eta ekimenak sortuz, Euskadiko gaitasunak sustatzeko ideia berriak eta ezagutza bultzatuz, herrialdearen erronka ekonomikoei eta sozialei aurre egiteko, hobekuntza iraunkorrerako eta kultura berritzailerako bokazioarekin", adierazi dute Getxoko Udaletik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun