Torresolo ingurua urbanizatzeko obrak eginda, jabegoko babes ofizialeko 58 etxebizitzen lehen promoziorako inskripzio epea zabalduko du astelehenean, hilak 11, apirilaren 30era arte, Leioako Udalak. Etxebizitzok azken sei urteotan gutxienez hiru urtez udalerrian erroldatuta egon diren herritarrei zuzenduta daude. Aurreko kolektiboari etxebizitza guztiak esleitzen ez bazaizkio, gainerakoak Leioan lan egitearen irizpide pean eskainiko dira (hiru urtez azken sei urteotan). Eta azkenik, aurreko bi kolektiboei etxebizitza guztiak esleitzen ez bazaizkie, gainerakoak edozeini eskainiko zaizkio, Leioako errolda baldintzak edo Leioarekin lan-lotura baldintzak bete ez arren. Hala ere, aurreko bi kolektiboek bezala, Eusko Jaurlaritzak etxebizitza babestua erosteko bere araudian ezartzen dituen baldintzak bete beharrekoak dira, edozein kasutan, tokiko agintariek zehaztu dutenez. Etxebizitzen zozketan izena emateko, Etxebiden inskribatuta egon ez arren, interesatuak dokumentazioa aurkez dezakete Udalaren Erregistro Orokorrean (Elexalde 1), astelehenetik ostiralera (09:00-14:00). Kultur Leioan ere entrega ditzakete agiriak, lehen solairuan, astelehenetik ostiralera (15:00-21:00) edo larunbatetan (11:00-14:00). Argazkian, aurreko etxebizitza zozketa bat Sakoneta kiroldegian / © Leioako Udala.
Torresoloko lehen promozioa pribatua da, Udalak 58 etxebizitzen eta dagozkien garaje eta trastelekuen eraikitze-eskubideak enkante publiko bidez besterendu ondoren, esparru horretako jarduera urbanistikoaren arabera, legeak horretarako eskubidea ematen baitzion. "Aipatu enkantea lehiaketa publikoan irabazi zen, Udalak eta etxebizitzak eraiki eta zozkatuko dituen Sukia Eraikuntzak SA enpresak deitutako lehiaketa alegia", azaldu dutenez. Promozioari, inskripziorako baldintzei eta aurkeztu beharreko dokumentazioari buruzko informazio guztia horretarako beren-beregi sortu den web orrian kontsulta daiteke (www.torresolo.com), 944 162 744 telefono zenbakian edo Kultur Leioako lehen solairuan (astelehenetik ostiralera, arratsaldez, eta larunbatetan, goizez). Etxebizitzak notario aurreko zozketa publiko bitartez esleituko dira. Zozketaren data aurretiaz jakinaraziko da udal komunikabideetatik eta inskribatuei idatziz egingo zaie deialdia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun