Getxoko udaltzainek atzo, igande goizaldean, Bilbon etxebizitza duen 30 urteko gizon bat atxilotu zuten, genero indarkeriaren delitua egitea egotzita. 01:05ak aldera, Algorta zaintzen ari zen tokiko polizia patruila bati jakinarazi zioten Koordinazio Zentrotik gizonezko bat emakume bat jotzen ari zela, Bolue eta Villaondoeta kaleen artean, udal iturriek zabaldu dutenez. Bertaratu ziren udaltzainek egiaztatu zuten gizon bat emakume bat jipoitzen ari zela, gaineratu dutenez. Bikotea banandu ondoren, emakumeak bekokia handituta zuela ikusi zuten, ustez gizonak eraginda eta horregatik Gurutzetako erietxera eraman zuten, han sendatzeko. Gizonak adierazi zuen duela urte batez geroztik bikotea direla. Poliziak atxilotu zuen eta epailearen esku utzi zuen. Argazkian, María Montserrat Marigó antsoaindarraren erailketa salatzeko kontzentrazioa otsailaren hasieran Algortan.
Keltse Eiguren Berdintasun Zerbitzuko zinegotziak giza eskubideen urraketa hori gaitzetsi du eta, aldi berean, tratu txar fisiko edo psikikoak jasaten dituzten emakumeak Gizarte Zerbitzuetara (944 660 151) jotzeko animatu ditu, "han egoeratik ateratzeko laguntza emango baitiete". Eigurenek gogoratu du Udaltzaingora (944 660 202) edo Ertzaintzara (944 063 420) ere dei dezaketela; baita Eusko Jaurlaritzaren tratu txarren biktimen telefono zenbakira (900 840 111) eta SOS Deietara (112) ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun