Eusko Jaurlaritzaren Segurtasun Sailak alerta laranja ezarriko du etzi, hilak 13, elurragatik. Euskalmet Euskal Meteorologia Agentziaren iragarpenen arabera, bihar bertan, arratsalde-gau partetik aurrera Eskandinaviatik datorren aire hotzeko masa polar batek goitik behera aldatuko du azken egunetan izan dugun eguraldia. Masa horren ondorioz, prezipitazioak izango dira eta tenperaturak nabarmen jaitsiko dira. Hala, prezipitazioak elur formakoak izango dira eguerditik aurrera mila metrotik gora, eta, eguneko azken orduetan, 300-500 metrotik gora. Euskalmeten arabera, ipar-haizea indartsu ibiliko da, batez ere, asteazkenean. Horrek hotz-sentsazioa areagotuko du. Asteazken eta ostegunean, gehienezko tenperaturak 5 eta 10 graduren bueltan ibiliko dira kostaldean, eta 5 gradu inguruan barnealdean. Gutxieneko tenperatutak, berriz, 0 eta 5 gradu ingurukoak izango dira kostaldean, eta 0-tik beherakoak, barnealdean. Hotza eta elurra bizpahiru egunez izango dira, eta ostiralean hasiko da pixkanaka arintzen. Argibide gehiagorako, kontsultatu UKBERRI.NETeko eguraldi zerbitzua. Argazkia: cc-by-sa karrikas.
Asteazkenean eta ostegunean, hainbat fronte eta ezegonkortasun-lerro iritsiko dira EAEra. Ondorioz, prezipitazio arinak izango ditugu sarri, bai eta zaparrada ekaiztsuak eta kazkabarra ere. Bi egunotan, elur-kota nahiko baxu kokatuko da, 200-400 metrotan. Baliteke, gainera, uneren batean, nukleo ekaiztsuetan gertatu ohi diren haize hotzaren beherakadekin bat, kota 200 metrotik behera kokatzea. Nolanahi ere, eguerdi-partean, kota nabarmen igoko da, eguzkiak martxoaren erdialdean duen indarra dela-eta. Prezipitazioak eta elurteak osteguneko, hilaren 14ko, arratsaldetik aurrera arinduko dira. Labur esanda, aire hotzarekin batera, negu-giroa datorkigu berriro eta berriro botako du elurra EAEko zati handi batean. Hori horrela, hego-haizea eta tenperatura leunak atzean utziko ditugu tarte batez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun