Bizkaiko Foru Aldundiak eta Getxo Kirolak udal erakundeak pertsona nagusiei zuzenduriko hitzaldia eskainiko dute ostegun honetan, martxoak 14, gorputz ariketak egitearen garrantziaren inguruan. Hitzordua 10:30ean jarri dute, Algortako Fadura kiroldegiko areto nagusian. Topaketan langile tekniko eta kirol medikuntzako adituek adinari egokituriko gorputz ariketak egitearen abantaila handiak azalduko dituzte, udal iturri getxoztarrek adierazi dutenez. Gainera, jarduera fisiko osasuntsuaren errutina erraz bat aurrera eramateko gakoak azalduko dituzte. Hitzaldia Bizkaiko Foru Aldundiaren Kirola Osasunaren Bidea kontzientziazio programaren barruan dago. Egitasmo hori, orain arte, lurraldeko 40 udalerritan aurkeztu da eta 1.500 pertsona inguruk parte hartu du bertan. Argazkian, hainbat adineko kirola egiten Larrabetzuko nagusien jaian / cc-by-nc Larrabetzutik.org.
Álvaro González Kirol zinegotziak, jorratuko den gaiaren garrantzia ikusirik, pertsona nagusi guztiak gonbidatu ditu Fadurara hurbiltzera. “Dei berezia egin nahi diegu gorputz ariketak eguneroko bizitzan duen garrantzia oraindik ezagutzen ez duten pertsonei. Getxok inguru paregabea dauka gorputz ariketak egiteko eta hitzaldian hainbat aukera emango dira udalerriak dauzkan eskaintza eta instalazio baliabideak zein pasealeku eta parkeak kontuan izanik”, azaldu du Gonzálezek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun