Duela 10 hilabete eskuko lau hatz galdu zituen Juan Carlos Goiriena 57 urteko Gorlizko bizilagunak. Jaiotzez Mungiakoa, belarra mozteko makinarekin izan zuen istripua bere etxean. Bada, joan den otsailaren 25ean, Gurutzetako Unibertsitate Ospitaleko Juan José García zirujau plastikoak eskuan behatz bat jartzeko ebakuntza egin zion, lehendabizikoa euskal osasun sistema publikoan. Operazioa 10 orduz luzatu zen. "Helburua zen pazienteak, gutxienez, bi hatz izatea eskuan, pintza bidigitala lortu ahal izateko. Izan ere, funtzio hori funtsezkoa da eguneroko aktibitateetan, hala nola, arkatz edo edalontzi bat jaso, botila bati tapoia kendu, edo zapataren kordoiak lotzeko", gaurko prentsaurrekoan Garciak azaldu duenez. Gaineratu duenez, helburu hori lortzeko, aukera onena zen eskuan behatz bat transplantatzea; "behatz bakar bat, alde-emailean eragindako ondorioek pazientearen ohiko aktibitateak ez baldintzatzeko, eta herrenik gabe korrika edo ibili ahal izateko". "Kasu honetan, xedea ez zen soilik akats bat berreraikitzea; funtzionala izan behar zuen. Hori dela eta, beste hainbat egitura ere berreraiki dira, hala nola, tendoiak, hezurra edo nerbioak", azaldu du zirujauak. Transplante mikrokirurgikoaren eboluzioa ona da, eta alta jaso ondoren, errehabilitazio-prozesuari helduko zaio. Argazkian, ebakuntza bat Gurutzetako ospitalean / cc-by Irekia.net - Eusko Jaurlaritza.
Kirurgia Plastikoko Zerbitzuak oso helburu kirurgiko espezializatua erdietsi du, lehendabizi Osakidetzako sarean, teknika mikrokirurgiko konplexuen bidez. Goi-mailako talde batek, mediku eta erizainek osatua (besteak beste, Mario Llop, Patricia Aguilar, Paloma Zayas zirujau plastikoak eta Sonia García, anestesista) ahalbidetu du interbentzioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun