Besteak beste, Getxoko Bilduk bertan behera uzten ditu egiteko instituzional guztiak eta 12:00etan egin behar zuten aurrekontuei buruzko prentsaurrekoa, Figueroaren heriotza dela eta. Horretaz gain, gaur Algortan izango zen Lurralde Antolaketari buruzko hitzaldia bertan behera gelditu da, "espetxe-politikak hil duen algortarraren aldeko mobilizazioak direla medio". Azkenik, Algortako Gazte Asanbladak gauean Getxoko Txorimalo gaztetxean ziren kontzertuak kendu ditu.
Anjel Figueroaren heriotzaren salaketa (cc-by Algortako Herrira)
Elkartasuna Urduliztik (cc-by Urdulizko Herrira)
Arratsaldeko 6etan irekiko dute Anjel Figueroa Fernandez euskal preso politiko gaixoaren hil kapera, Algortako Etorbideko 69. zenbakian dagoen Sarria beilatokian. Gaueko 9ak arte egongo da zabalik. 20:00etan, berriz, kontzentrazio isila izango da Telletxe plazan, Algortako herritarrek deituta. Iruñean ere elkarretaratzea deitu dute, "Espetxe politikak hil egiten du. Gaixo dauden presoak kalera orain!" lelopean. Hitzordua 20:30ean jarri dute PPren egoitzaren aurrean. Bitartean, espetxe politikaren kontrako zein Figueroaren aldeko pintaketez, kartelez eta dolu-xingola beltzadun ikurrinez agertu da goizetik Algorta. Gainera, hainbat eragilek gaurko aurreikusita zeuzkaten ekitaldiak bertan behera utzi dituzte, tartean Uribe Kostako EH Bilduk, Getxoko Bilduk eta Algortako Gazte Asanbladak. Atzo 14:30 aldera hilik aurkitu zuten Anjel Figueroa Fernandez euskal preso politikoa bere etxean. Algortarra espetxeratze arinduan zuten preso, epilepsia bezalako gaixotasun larria pairatzen baitzuen. 41 urte zituen soilik eta preso eman du ia bizi erdia, 1994an atxilotu zutenetik. Argazkian, Figueroa oroitu dute Telletxe plazan / cc-by Algortako Herrira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun