"Udalak bere kabuz (dekretuz) onartu ditu aipatutako lehiaketa hori arautuko duten oinarriak, sindikatuoi aurretiaz ezer jakinarazi gabe, eta inolako negoziazio barik, irizpide orokorrak ezartzeko plangintza bat taxutze aldera, indarrean dagoen legediak agintzen duenez (EBEP 37.1.c)", salatu du LABen tokiko atal sindikalak. Lan-poltsei dagokienean, Erandioko Udalean daukagun araudia da, edozelan ere, 2009ko akordioa, Udala eta sindikatuen artekoa, gogoratu dutenez
Akordio horrek honela dio, bere lehen bi paragrafoetan:
- Lan-poltsen xedea da aldi baterako kontratuak egitea eta, horien bidez, aldi baterako bete behar diren lanpostuak betetzea behin-behineko edota noizbehinkako beharrei aurre egiteko.
- Hori horrela izanik, lan-poltsak ez dira egiturazko lanpostuak betetzeko erabiliko. (…)
Arkitekto teknikoen lan-poltsa osatzeko arautuko duten oinarrietako lehenengoak, aldiz, honakoa zehazten du:
- Deialdiaren helburua da lan-poltsa bat eratzea, Erandioko Udalean aldi baterako edo noizbehinkako premiei erantzuteko, eta bereziki, indarrean dagoen lanpostuen zerrendan jasotako arkitekto tekniko lanpostuak aldi baterako betetzeko.
Hartara, hutsik dauden arkitekto teknikoen lanpostuak bi dira, eta horiek biak, gainera 2010eko Enplegu Publikoaren Eskaintzan daude (BAO. 114. zk. 2010, ekainak 17).
"Horietariko bat behin-behinean beteta dago, eta bestea, ordea, hutsik. Hortaz, arkitekto teknikoen lan-poltsa osatzeko lehen oinarrian argi geratzen denez, lan-poltsa erabiliko da bete barik dagoen egiturazko lanpostua betetzeko behin-behineko langile batekin, indarrean dagoen akordioa urratuz, eta baldintza eskasak areagotuz", LABen arabera.
"Lanpostu finkoak aldi baterako langileekin bete nahi izatea" leporatu diote Erandioko Udalari
Erandioko Udalean agintean dagoen EAJk "lanpostu finkoak aldi baterako langileekin bete nahi dituela" salatu du LABek. "Izan ere, egiturazko hainbat lan-postu hutsik egon arren, oposizio sistemaren bidez behin betiko bete behar direnak, lan-poltsen sistema lehenetsi da, modu horretan ezegonkortasuna eta areagotuz eta klientelismoa sustatuz", adierazi du sindikatu abertzaleak. Horren adibide bezala jarri du Erandioko Udalak abiatu duen lehiaketa, arkitekto teknikoen lan-poltsa bat osatzeko, "nahiz eta oposizioaren bidez bete beharko liratekeen arkitekto teknikoren bi lanpostu hutsik egon Udalaren egituran". Gauzak horrela, Erandioko Udalaren Langileen Ordezkaritzak alkateari eskatu dio bere erabakia berraztertzeko, eta bertan behera uzteko arkitekto teknikoen lan-poltsa osatzeko deialdia. Horren ordez, eskatu dio gauza dezala 2010eko EPE, eta hautaketa-prozesua abian jar dezala oposizio edo lehiaketa-oposizio librea sistemaren bidez, eta behin betiko betetzeko hutsik dauden lanpostuak. Noizbehinkako beharrei aurre egiteko lan-poltsarik behar izatekotan, hautaketa-prozesua gainditzen duten, baina lan-postua lortzen ez duten hautagaiez osatu behar da (lan-poltsa), Udal honetan adostua dugun legez. Horrez gainera, LABek, bere aldetik, ez du baztertzen auzitara jotzea, alkateak muzin egiten badio eskatutakoari. Izan ere, sindikatu abertzalearen ustez, "Udalak irregulartasun larria egin du kasu honetan, eta, gainera, argitaratutako oinarriak ez dira batere argiak, eta subjektibotasunerako bidea zabaltzen dute, berdintasunaren printzipioa urratuz". Argazkian, Erandioko udal langieek aurreko elkarretaratze batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun