Lehenengo lapurreta, abenduaren 19an, gaueko 11ak aldean izan zen, Segurtasun Sailak zabaldu duenez. Gazteen lonja baten barruan bi adingabe zeuden eta, bat-batean, lokalean bi gizonezko sartu eta lapurtu egin zieten, ateko kisketa ez baitzegoen barrutik itxita. Lapurretako batek neurri handiko sukaldeko aizto batekin egin zien mehatxu, eta beste bat zeraman gerrian. Polizia iturrien arabera, lapurrek hauexek ostu zizkieten biktimei: droga apur bat (haxixa eta marihuana kopuru txikitan), mahaigaineko bideo-kontsola bat, LTDa hartzeko gailu bat eta bi sakeleko telefono.
Bigarren lapurreta otsailaren 24ko gaueko 10ak aldean izan zen, udalerri horretako gazteen aisiarako beste lokal batean. Oraingoan bi gizonezko sartu ziren lonja batean, horietako bat sukaldeko aizko batekin, eta bertan zegoen gazte bat ikaratu zuten. Biktimak kalterik nozitu gabe egin zuen ospa; lapurrek, orduan, diru pixka bat zuen kutxa gotor bat, gerriko poltsa bat (telefono bat, bankuko txartelak eta dokumentazioa zituen barruan) eta haxix zein marihuana kopuru txikiak eskuratu zituzten.
Lau gizon atxilotu dituzte Erandioko gazteen bi lonjatan larderiaz lapurtzea egotzita
Ertzaintzak lau gizonezko atxilotu ditu azken orduotan, horietako bat adingabea, Erandioko gazte-aisiarako bi lonjatan hainbat neska-mutili larderia erabiliz egindako lapurretekin lotuta dutelakoan. Eusko Jaurlaritzaren Segurtasun Sailak zabaldutakoaren arabera, lapurretok abenduaren 19an eta otsailaren 24an izan ziren. Ertzaintzak ikerketa zabaldu eta 39 urteko gizonezko bat identifikatu zuen lapurretak egiteko neurri handiko sukaldeko aiztoa zeraman lapurra zelakoan; aurretik hamahiru aldiz atxilotu dute gizonezko hori, polizia iturriek diotenez. Egun bat geroago atxilotu zuten Bilboko bere etxean. Gizon horri leporatu diote lehenengo lapurretan parte hartu izana, eta beste hiru gizonezko gehiago ere atxilotu dituzte, tartean adingabe bat, larderia erabiliz egindako lapurreta horietan parte hartu dutelakoan. Ertzaintzak zabalik ditu eginbideak oraindik. Hala, aisiarako lonjak dituzten gazteei eskatu diete horrelako lapurretarik pairatu badute Erandioko ertzain-etxeko ikerketa atalarekin harremanetan jartzea, beharrezko salaketak egin ditzaten. Atxilotuak datozen orduetan eramango dituzte epailearen aurrera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun