Iruñeako Aberri Egunera joateko autobusak jarri dituzte Uribe Kosta eta Erandion
"Etorkizuna independentzia" lelopean, Iruñean egingo du aurtengo Aberri Eguna igande honetan, martxoak 31, Independentistak Sareak. Eragile horrek krisiarekin lotu du Euskal Herriaren egoera. Uste dute Euskal Herria "hipotekatuta" dagoela, eta halaxe segituko duela, "gure bidea libreki hartzen ez dugun bitartean". "Itotzen gaituzten loturak hautsi behar ditugu. Eta independentzia da horren gakoa. Erabakirik har ez ditzakeen herria ez da aske, besteen menpekoa baizik, eta guk herri askea izan nahi dugu", esan zuten hilaren 16an Iruñean egindako agerraldian. Hain zuzen ere, aldarrikapena eta festa uztartuko dituen Aberri Egunera joateko autobusak izango dira Uribe Kosta eta Erandion. Ondoko geldialdiak egingo ditu garraioak: 09:00etan, Plentzian; 09:10ean, Sopelan; 09:20an, Berangon; 09:30ean, Algortan; 09:40an, Itzubaltzeta / Romon; 09:50ean, Leioan; eta 10:00etan, Erandion. Autobusean izena emateko tokian tokiko herriko tabernara jo beharko dute Aberri Egunera joan nahi dutenek; edo bestela independentziaUK[abildua]gmail.com helbide elektronikora idatzi. Osteguna, martxoak 28, izango da horretarako azken eguna. Argazkian, 2012ko Aberri Eguna Iruñean / © Independentistak Sarea.
Iruñean egingo den Aberri Egunak goizetik gauerako egitaraua izango du. Manifestazioa eguerdiko 12etan hasiko da Golem zinemetan eta Sarasate pasealekuan amaituko da. Ondoren, bertan izango da ekitaldi politikoa. Baina, ospakizunak segida izango du egun osoan zehar: herri bazkaria Anaitasuna kiroldegian, eta Indefesta arratsalde eta gauean zehar, Iruñeako Alde Zaharrean; adin guztietako jendearentzat ikuskizunak eta jaia, alegia. "Aberri Egun guztiz zabala eta parte-hartzailea izatea nahi dugu: independentista guztiok aniztasunean elkarturik aldarrikapena eta jaia uztartzeko eguna", azaldu du Independentistak Sareak. Hartara, independentista guztiei Iruñeara joateko deia egin diete; "sufritzen ari garen egoera ekonomiko eta sozial hain larri honen aurrean inoiz baino indartsuago gure etorkizuna defendatzeko. Independentziaren beharra eta premia aldarrikatzeko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun