Ostiraletik astelehenera Gazte Danbada izango da Urduñan. Ernai gazte antolakundearen jaiotzaren jaialdia da, eta aukera zabala egongo da eztabaidarako, gogoetarako, sormenerako, baita festarako ere. Tailerrak, mahainguruak, hitzaldiak, antzerkiak, kale animazioa eta kontzertuak egingo dituzte lau egunetan zehar. Lau egunetarako banakako bonoak salgai daude 45 eurotan, besteak beste, Leioako Kurkudi, Algortako Abian etab Itzubaltzeta / Romoko Branka kultur elkarteetan. Horretaz gain, egunekako sarrerak Gazte Danbadan salgai egongo badira ere, jada internet bidez eskuratu ahal dira 20 eurotan: ostirala, larunbata eta igandekoa. Bestalde, Renfe-k Bilbo eta Urduña artean tren zerbitzu berezia jarriko du. Argazkian, mila gazte ingururen aurrean ernaldu da Ernai martxoaren 2an / cc-by-nc Topatu.info.
Besteak beste, elikadura burujabetza, desobedientzia eta hondakinen kudeaketa tailerrak izango dira, praktikarekin kontzeptuak gehiago barneratzeko. Mahai-inguruetan eta hitzaldietan eztabaidarako aukera sortuko da. Esaterako, jai ereduari, Ipar Euskal Herriko egoerari, gazte problematikari eta kulturgintzari buruzko solasaldiak izango dira. Kontzertuei dagokienez, musika estilo anitzeko atzerriko eta bertako taldeak gerturako dira Urduñara. Adibidez, The Toy Dolls, South Central, Matxura, Cobra, Sen, Willis Drummond eta Los Chikos del Maiz.
Gauero, umore kutsua izango duen telebista saioa egingo dutela iragarri dute, eta Topatu.info agerkari digitalean zintzilikatuko dute 20:00ak bueltan.
Nazioarteko hainbat gazte antolakundeen ordezkaritza izango du Gazte Danbadak. Bretainia, Palestina, Suedia, Irlanda, Kurdistan, Flandria eta Herrialde Katalanetako gazteak, besteak beste, gerturako dira Urduñara.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.