Batxilergoko 1. eta 2. mailako ikasleei zuzenduta dagoen Olinpiadaren finalean, lehen faseetako irabazle suertatu diren 77 ikasleek zein iazko 5 irabazleek hartuko dute parte. 9:30etik 13:00etara, problemen lehen saioa egingo dute, eta larunbatean, ordutegi berean, bigarrena. Bi egun horietan, parte hartzaileek hainbat problema ebatzi beharko dituzte arrazoibideak erabiliaz; hain zuzen ere, kalkulu mekanikoak egin baino gehiago, beraien ezagutza matematikoak era burutsu eta originalean aplikatu beharko dituzte.
Behin froga guztiak bukatuta, urrezko 6 domina, zilarrezko 12 eta brontzezko 18 banatuko dira. Sarien banaketa ekitaldia EHUk Bilbon duen Bizkaia Aretoan burutuko da larunbatean, hilak 6, 19:00etan. Azken fase horretako lehen sei sailkatuek, urrezko sei dominen irabazleek, alegia, uztailaren 18tik 28ra bitartean Kolonbiako Santa Martan egingo den 54. Nazioarteko Matematika Olinpiadan parte hartuko duen talde olinpikoa osatuko dute, eta irailean Panaman egingo den 28. Iberoamerikako Matematika Olinpiadan parte hartzeko hautagai izango dira.
Bihar, ostirala, eta etzi Espainiako 49. Matematika Olinpiadaren finalaren probak hartuko ditu EHUk Leioan eta Erandion duen campusak. Goizeko 9:30etik aurrera, Zientzia eta Teknologia Fakultateko hitzaldi aretoan egingo dira Estatu espainoleko lehiaketaren azken fasea eta Mundu mailan aritzeko kanporaketak. Izan ere, Euskal Herria, Herrialde Katalanak, Galizia, Gaztela eta Estatuko bestelako nazioetako 82 ikaslek uztailean Kolonbian burutuko diren Nazioarteko Olinpiadarako sei txartelak eskuratzeko norgehiagoka aritu beharko dira bihar. Biharkoa lehen aldia izango da EHUko zentro batek Matematiken Espainiako Elkarteak sustatzen duen Matematika Olinpiadaren azken fase hartuko duena. Zientzia eta Teknologia Fakultateko Matematika Atalak antolatu du ekimena. Argazkian, hiru gazte ekuazio diferentzialak askatzen / cc-by-sa Juraj Kubica.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun