Iñigo Cabacas "Pitu" gogoratzeko ekitaldiak
Gaur, ostirala
• 19:00etan: Omenaldia, Bilboko Maria Diaz de Haro kalean, Cabacasek pilotakada jaso zuen lekuan.
Apirilak 9, asteartea
• 19:00etan: Kafe Antzokian, dokumentalaren aurkezpena eta ekitaldia, heriotzaren urteurrenean.
Apirilak 10, asteazkena
• 19:00etan: Hika-Ateneoan, Cesar Manzanos Salhaketako kidearen hitzaldia.
Apirilak 11, osteguna
• 19:00etan: Hika-Ateneoan, mahai ingurua polizia ereduari buruz, Paul Rios Lokarriko kide algortarra, Joseba Nafarrate abokatu eta Xuban Nafarrateren aita, Carles Guillot Stop Bales de Goma taldeko kidea eta ELA sindikatuko Ertzaintza ataleko kide batekin.
Apirilak 13, larunbata
• 18:00etan: Manifestazioa Eusko Jaurlaritzaren egoitzatik abiatuta (Kale Nagusia, 85), eta Bilboko justizia jauregiraino.
Urtebete da Iñigo Cabacas Lizeranzu 28 urteko gaztea Ertzaintzaren pilotakada batek jo zuela, Bilbon, Athletic-Schalke 04 futbol partidaren ondoren. Handik lau egunetara hil egin zen Basauriko mutila. Bada, gaurkoan, Gervasio Gabirondo Ertzaintzako zuzendariak esan du "inork ez zuela egindako mina egiteko asmorik"; eta berretsi du Ertzaintzak ez duela barne ikerketarik hasiko. Hitz horiek kontuan hartuta, Gabirondoren dimisioa eskatu du Sortuk. Ezker abertzaleko alderdiak, Ertzaintzaren zuzendariak Iñigo Cabacasen hilketa istriputzat jotzea "onartezina izateaz gain, arduragabekeria galanta" dela salatu du. "Urtebete igaro da Rodolfo Aresen Ertzaintzak Cabacas hil zuenetik, eta EAJk orain zuzentzen duen Segurtasun Sailari dagokio ikerketa bizkortuko eta azkeneraino eramango duen informazio eta baliabide oro epailearen esku jartzea", gaineratu dutenez. Ondorioz, Gabirondok "duela urtebete jazotako hilketa babesteko eta zuritzeko harturiko bidea eskandalagarria" dela adierazi du Sortuk, haren dimisioa eskatzearekin batera. Bitartean, erantzun eske segitzen dute Cabacasen senideek eta lagunek. Gaur bertan, kontzentrazioa izango da 19:00etan Ertzaintzaren pilotakadak basauritarra jo zuen tokian, Maria Diaz de Haro kalean. Argazkian, 2012ko apirilaren 10ean Iñigo Cabacasi heriotza eragindako "basakeria" salatu zuten ehunaka lagunek Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun