Espainiako eta Frantziako Estatuek euskal preso politikoen aurka darabilten "muturreko espetxe politikaren aurrean" erantzun bat ematera deitu zuen asteartean Herrirak. Mugimenduak salatu zuenez, Xabier Lopez Peñak jasandakoa eta bere senideak sufritzen ari direna, Estatuek espetxe politikaren bitartez euskal preso politikoen aurka erabiltzen duten "doako biolentziaren kasu bat baino ez da", adierazi zuen Herrirak, eta martxoan bestelako irudi lazgarri batzuk izan direla gaitzetsi du. Horien artean Anjel Figueroa etxean preso zeukaten algortarraren heriotza, Muret, Puerto III eta Sevillako espetxetan euskal presoek jasandako jipoiak edo Jabi Martinez Izagirre presoaren senideek Jaenetik bueltan izandako istripua aipatu zituzten. Bada, bihar, larunbata, manifestazio isilak zeharkatuko ditu Bilboko kaleak, “Berriro gerta ez dadin. Salbuespen neurriak eten. Giza eskubideak, irtenbidea, bakea” lelopean. Martxa 17:30ean abiatuko da Casillatik. Bitartean, gaurko Bilbo, Basauri, Galdakao, Gasteiz, Iruñea, Donostia, Baiona, Donibane-Lohitzune, Hazparne, Donibane-Garazi eta Maulen deituak zeuden mobilizazioak. Beste horrenbeste egingo dute 20:00etan, Sopelako udaletxe aurrean. Argazkian, martxoaren 15ean, iluntzean, 800 lagun baino gehiago batu ziren Anjel Figueroaren heriotza salatu eta preso politiko gaixoak orain aska ditzatela aldarrikatzeko / cc-by Algortako Herrira.
Xabier Lopez Peña Galdakaoko preso politikoa larunbatean hil zen. Arazo kardiobaskularrak zituen aurretik ere, eta martxoaren 11n espetxetik erietxera eraman zuten bihotzekoak jota. Haren egoerak okerrera egin zuen ostegun eta ostiralean, eta larunbat goizaldeko ordubatean hil zen. Familiak ez zuen heriotzaren berririk izan, harik eta 13:00etan presoa bisitatzera joan ziren arte. Hilda zegoela esan zieten, baina arazoak jarri zizkieten gorpua ikusteko. Aske uzteko eskaera eginda zuten arren, preso zegoela hil zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun