Ikuskizun horrekin hausnarketa eragin nahi dute, zenbait giza errealitatera hurbilduta. Horretarako, bonbardaketan hil zirenek –berpiztu ostean– azaltzen dute gertaturikoa. Ezbeharraren aurretik nolako bizimodua zuten eta bonbardaketak utzitako ondorioak kontatzen dituzte. Dantza tradizionala eta garaikidea batzen ditu emanaldiak. Memoriaren bidez bizi berri batean berpiztea posible dela adierazten dute dantza emanaldiko protagonistek.
Argi eta koloreez gain, doinuak ere garrantzia dauka: Aitor Amezagak konposatutako musikak eta Pablo Sorozabalen Gernika martxa ezagunak girotzen dute ikuskizuna. Era berean, Alaitz Ormazabalen ahotsak ere Gernikako sarraskiaren memoria "bizirik mantentzen" laguntzen du, konpainiako kideen esanetan. Izan ere, narratzaile zein abeslari moduan, kontu eta bertso zaharrak uztartuz, gertatu zena azaltzen du.
Hamasei urteko ibilbidea
Orain dela hamasei urte sortu zuten Aukeran dantza konpainia, eta ordutik tradiziozko dantza hizkuntza berriak sortzen dihardute. Ballet klasikoa eta dantza garaikidea lantzen dituzte. Koreografietan arau asko desegituratu eta garaiko atalak eransten dituzte. Horrela, euskal tradiziozko dantzaren aberastasuna erakusteko asmoz, hizkuntza berri eta gaurkotuago bat lortuz.
Larunbat honetan "aukera paregabea" izango da Euskal Herriko historiaz, dantzaz eta bertako sorkuntzaz gozatzeko Sopelan, Betitxe Saitua bertako Kultura zinegotziak adierazi bezala. Izan ere, Aukeran dantza konpainiaren "Gernika, danza sobre lienzo" lana ikusgai izango dua Kurtzio kultur etxean, 20:30etatik aurrera, txartela 6 eurotan eskura daitekeela. Edu Muruamendiarazek zuzenduta, "Gernika, danza sobre lienzo" 1937ko apirilaren 26an Gernikan gertatu zen bonbardaketaren kontakizuna da; protagonisten ahotan, lehenengo pertsonan azalduta. Hain zuzen ere, hainbat herritarrek beren bizipenak eta testigantzak kontatzen dituzte. Proposamenak dantza tradizionala eta garaikidea batzen ditu hamaika dantzarien bitartez: Aiert Beobide, Iurre Aranburu, Gotzon Poza, Maitane Mugika, Ander Errasti, Onintza Odriozola, Ioritz Galarraga, Naikari Galarraga, Ekain Kazabon, Ane Anza eta Garazi Lekuona. Argazkian, ikuskizunaren irudi bat / © Aukeran.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun