Herriko musika taldeei jaietan jotzeko aukera emango die Sopelako jai batzordeak

Urtero legez, Sopelako musika taldeek Sanpedroetan eta Karmenetan, herriko jaietan, jotzeko aukera izango dute, aurretik izena emanez gero. Ohi bezala, Sopelako jai batzordeak izen-ematea zabaldu du, igandean amaituko dena. Bete beharreko baldintzak lau dira: 1.- Taldeko partaideetariko batek gutxienez, Sopelan erroldaturik egon beharko du. 2.- Talde bakoitzak bere biografia eta CD bat eraman beharko du Kurtzio Kultur Etxera, eta kontakturako telefono edo posta elektroniko bat utzi. 3.- Beharrezkoa izango balitz, herriko talde guztien arteko zozketa bat egongo litzateke eta irabazleek Sanpedroetako edo Karmenetako jaietan jotzeko aukera izango dute. 4.- Taldearen euskararen erabilera kontuan izango da (abestien letretan edo taldearen aurkezpenetan eta abar). Materiala aurkezteko azken eguna igandea da. Horretarako ordutegia honakoa izango da: 11:00-14:00 eta 16:00-20:00. Galderarik izanez gero, 944 065 505 telefonora deitu edo kultura[abildua]sopelana.net posta elektronikora idatz daiteke. Argazkian, Rise to Fall boskote ezaguna izan da jaietako oholtzak baliatu dituen taldeetariko bat.