Juan Kalparsoro Euskal Autonomia Erkidegoko fiskal nagusiak Euskadi Irratian esan duenez, pare bat astetan hartuko du Laura Mintegi EH Bilduko bozeramaile algortarraren auziari buruzko erabakia, baina litekeena auzia artxibatzea dela aurreratu du. "Oso zaila da aurrera ateratzea, legebiltzarkidea da eta Estatutuaren arabera pribilegioa du; hori oztopo garrantzitsua da", azaldu du magistratuak, legebiltzarkideen bortxaezintasuna aipatuz. Kalparsorok ikerketa abiatu zuen joan den martxoaren 21ean Mintegiren aurka, aurreko astean Eusko Legebiltzarrean egindako saioan terrorismoa goratu ote zuen argitzeko. Saio horretan, Fernando Buesa sozialistaren hilketak "jatorri politikoa" zuela eta "elkarrizketaren bidez saihestea posible" zela esan zuen koalizio abertzalearen bozeramaileak. Argazkian, Laura Mintegi Algortako Getxo I institutuan bozkatzen, 2012ko urriaren 21eko Eusko Legebiltzarreko hauteskunde egunean.
Fernando Buesaren omenaldian ''lasai asko'' egon izana leporatu zion Arantza Quiroga PPko legebiltzarkideak Laura Mintegiri, eta EH Bilduko ordezkariak kritika horri erantzun zion. "Egon badago zirkinik egin gabe uzten ez nauen gauzarik. Ezin da esan lasai asko egon nintzela biktima baten omenaldian, biktima guztiek arrazoi politiko batengatik hil direlako, ez istripu batean, bihotzeko batek jota, minbiziak jota edo zorigaizto baten ondorioz'', esan zuen Mintegik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun