Gaur goizeko 10etan aurreikusita dago Iker Rodrigo Bizkaiko Sorturen Lurralde Kontseiluko koordinatzaile ordea Espainiako Auzitegi Nazionaleko 6. epaitegian Eloy Velasco magistratuaren aurretik agertzea. Inputatu gisa azaldu behar badu ere, komunikazio egoeran eta Jone Goirizelaia bere abokatuak lagunduta egingo du. Epaileak Xabier Lopez Peña euskal presoa zenaren harreren inguruan galdekatuko du horiek antolatu zuelakoan eta "terrorismoa goratzea" leporatuta. Izan ere, hori dela eta Guardia Zibilari atxilotzeko agindu zien atzo. Sondikako saioan "Gora ETA" oihu batzuk izan ziren eta Carlos Urquijo Espainiako Gobernuaren ordezkariak horiek ikertzeko eskatu zuen. Madrilgo prentsak ere hauspotu egin du gertatutakoa. Erandioko Lutxana auzoko semeak, baina, bere alde izango du atzo Lopez Peñaren familiak Sortuko kidearen atxiloketa ezagutu eta gutxira atera zuen komunikatua, haien senidearen harrerak ez Sortuk eta ezta beste talderik ere ez zituztela antolatu, "ekitaldi pribatuak" baitziren. Sortuk ere ukatu du antolakuntza lanetan aritu izana eta kidea "berehala" askatzeko exijitu du. Bitartean, atxiloketaren aurka 480 bat auzokidek martxa egin zuten Erandion. Gaur, 20:00etan beste mobilizazio bat dago aurreikusita Itzubaltzeta / Romo eta Areeta artean dagoen Xake plazan."Bahiketa"
Bere aldetik, Iker Jalon Erandioko Bilduren zinegotzia atxikimendua agertu zien Rodrigori eta bere senideei eta dagoeneko bere abokatuarekin izateko aukera izan duela azaldu zuen. Salatu zuenez, atzokoa Iñigo Cabacas eta Santi Brouard-en hilketen inguruan berba egiteko eguna zen, baina horretarako astirik ez, Rodrigoren "atxiloketa politikoa" dela medio. "Bahiketa" horrek helburu "garbia" duela iritzi zion: "Sorturen lana kriminalizatu eta, bide batez, ilegalizazioaren mehatxurekin gure lana baldintzatzea". Are gehiago, Jalonen ustez "Martxan dagoen prozesuari trabak jarri eta blokeo egoera iraunkorra bihurtu nahi dute Madrilgo agintari putreek, etxean ezagunak ditugun haien kolaboratzaile leialen laguntzaz".
Rodrigoren atxiloketa bezalakoekin Euskal Herria "mina eta gorrotora" zigortu nahi dutela adierazi zuen zinegotzi erandioztarrak. "Baina ez diegu utziko" irmo agertu zen. "Gaur omenaldi bat, bihar adierazpen batzuk eta hurrengoan argazki bat izan daiteke bilatzen duten aitzakia, baina oinarrian ezker abertzaleak sustatutako ekimenari dioten beldurra dago, Euskal Herrian benetako demokrazia eta bakerik ez dute nahi" ziurtatu zuen Jalonek. Horren aurrean, "Euskal Herri aske, feminista eta sozialista" eraikitzen jarraitzera deitu zuen, tartean erasoen aurrean "herri osoa" izango dutela.
Atxiloketa Txopoetan
Iker Rodrigo Basterretxea Sortuko Bizkaiko Herrialde Kontseiluko koordinatzaile ordea atzo goizean atxilotu zuen Guardia Zibilak. Albiste-agentziek Espainiako Auzitegi Nazionalera, Madrilera, eramango zutela iragarri bazuten ere, lutxanarra Bilboko La Salve kasernara eraman zuten, senideek UKBERRI.NETi azaldu ziotenez. Rodrigori ez zioten komunikazio murrizkeztarik ezarri eta abokatua eskatu zuen. Halere, Guardia Zibilaren aurrean deklaratzera nahi ez zuenez hasiera batean abokatua ikustea uko egin zioten Rodrigori. Beranduago, baina, Jone Goirizelaiak ikusi ahal izan zuen Erandioko Bilduk zabaldu duenez.
Guardia Zibilak Txopoetan atxilotu zuen Rodrigo, beren beregi berarentzat jarritako kontrol batean. Atxiloketa goizeko 8:45ak aldera egin zuten, aitaren aurrean, kontrola bere etxe azpian izan zela. Halere, Iker Rodrigo Itzubaltzeta / Romoko bere etxetik auto batek jarraitu zuela azaldu dute. Barne Ministerioak kaleratutako oharraren arabera, Xabier Lopez Peñaren hilotzari Sondikan eta Galdakaon eginiko harrerak antolatu zituelakoan, "terrorismoa goratzea" leporatu zioten.
Iker Rodrigoren atxiloketa
Rodrigoren aldeko martxa