Rodrigok bere ezker ona agertu die bertaratutakoei zein atxiloketan zehar bere senideei eta gertukoei berotasuna helarazi dieten guztiei. Era berean, "besarkada bero bat" bidali die "hemendik momentu honetan Donostian, Aske Gunean, espetxeratze zain dauden zortzi gazteei". Ez da bakarra izan, halere, gazte donostiarrak aipatzen. Itzubaltzeta / Romo eta Areetako Sortuko ordezkariek gogor kritikatu dute bai Auzitegi Gorenak egindako sententzia, "lan politiko egiteagatik" gazteak "sei urtera espetxeratuko dituztelako" eta baita EAJk egoera politiko berriari "egin nahi dion ekarpena, aurreko astean ikusi genuela zelan sartu ziren Aske Gunean, biolentzia ikaragarria erabiliz". Tokiko Sorturen ustez EAJren joera da "kezkagarriena", Estatu espainiarrak gatazkaren konponbidea boikoteatzeko egingo ei dituen saiakeren aurrean EAJk "espainolen morroi" agertuko omen duelako. Hirugarren "eraso larri" bat gogoratu dute, Lopez Peña eta Angel Figueroaren heriotzak, "espetxe politika krudelaren ondorio izan direnak". "Herri honetan ezagutu dugun ukazioa, zapalketa eta errepresioaren" estrategia "orokor" horren pean kokatu dute Iker Rodrigoren atxiloketa, "Estatu espainolak daukan krisi estrukturala" zein "PPren Gobernuak dituen eskandalu guztiak ezkutatze aldera" baliagarria ei dena. Gainera, "azken asteetan Sortu eta EH BIlduren ilegalizazioen inguruan aritu" izanaren ondorioa ere bada Rodrigoren harrapaketa, "ezker abertzalearen ekinbide politikoa oztopatzeko edo neutralizatzeko".
Testu-inguru horretan, Sortuk, berretsi du "Zutik Euskal Herrian" abiatutako ibilbideari eutsiko diola eta dei egin du "auzoz auzo eta herriz herri Euskal Herriaren kontrako eraso guzti hauei erantzuteko, hori izango delako espainiar Estatua eta beste eragileak gatazkaren konponbiderako parametroetara eramateko" modua.
Gaurko martxaren argazkiak
Elkartasuna legezkoa dela aldarrikatu dute Itzubaltzetan, Rodrigori harrera eginda
Bera atzo atxilotzean bi helburu nagusi zeudela iritzi dio gaur Iker Rodrigo Basterretxea Itzubaltzeta / Romoko auzokide lutxanarra eta Bizkaiko Sorturen koordinatzaileordeak. Alde batetik, "esker abertzaleari Estatuaren partetik mezu bat helaraztea: ez digutela utzi nahi, ez digutela bidea erraz jarriko". Hor kokatu du "nire atxiloketarekin Sorturen kontra muntatu dituzten aldamio mediatiko-politiko-juridiko guztiak". Beste aldetik, "elkartasuna bera delitu bilakatzea" ere xedea zelakoan dago. Eta horren aurrean argi esan du elkartasuna "ez dela delitua". Hori dela eta, "tinko mantentzera" deitu eta "presoen senideekin jarraituko dugula eta beraien alboan gure berotasuna eta gure elkartasuna adierazten eta beraiekin batera aurrera egingo dugula" agindu du. Aipatu deklarazioak Areeta eta Itzubaltzeta / Romo zeharkatu dituen "Elkartasuna ez da delitua. Konponbide garaia da!" lelopeko martxaren ostean eta askatasuna berreskuratu eta ordu gutxitara egin ditu, 130 bat auzotarren aurrean. Manifestazioa abiatu aurretik ere, Iker Rodrigo agurtzeko eta besarkatzeko baliatu dute unea hainbat auzotarrek. Izan ere, atzo Guardia Zibilak atxilotu zuen eta Espainiako Auzitegi Nazionalean deklaratu ostean Eloy Velasco epaileak aske utzi du, "terrorismoaren goratzea" leporatu badio ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun