Kosta zaio, bai, Ertzaintzari jendea banaka ateratzea, iritsi diren unean ere ehunka baitziren gazteei babesa ematen ari zirenak. Lekukoen arabera asko ziren hurbildutako ertzainak. Bulebarra moztu egin dute ibilgailu eta oinezkoentzako, eta modu horretan hasi dira goizaldean gazteak atxilotu nahian. Hasiera arrastaka eraman dituzte Herri Harresian zeudenak baina gazteak dauden lekura gerturatu ahala, orduan eta jarrera bortitzagoa izan dutela ertzainek diote lekukoek.
Atxiloketen bideoa (cc-by-sa Argia.com)
Ertzaintza goizeko 6ak inguruan iritsi da Donostiako Bulebarrera, eta ordu erdi geroago hasi da Herri Harresia desegin nahian, besteask beste, Berria.info agerkariak zabaldu duenez. Bi ordu geroago atxilotu dituzte aurreko astean Segikoak izatea leporatuta, torturapeko deklarazioetan oinarrituta, espetxera zigortutako gazteak. Zigortuetako sei zeuden Aske Gunean. Tarte horretan, Herri Harresian zeuden ehunka lagun askatu behar izan dituzte ertzainek. Jarrera erabat baketsua izan dute harresikoek, baina Ertzaintza borrekin eta kolpeka oldartu zaie handik ateratzeko. Hainbat zauritu daude Ertzaintzaren indarkeriak eraginda; gutxienez 20. Harresitik atera ondoren ere ertzainek iraindu dituztela salatu dute zenbaitzuek: "Iletik tiraka eraman naute, betaurrekoak hautsi dizkidate, puta naizela esan eta guztiak bortxatuko gaituztela esan didate", salatu du neska batek, AskeGunea Twitterreko erabiltzailearen arabera. Zigortutakoez gain, beste bi lagun atxilotu dituzte, Ertzaintzari aurre egin diotelakoan. Argazkian, ertzain bat bildutakoak grabatzen artxiboko irudian. Ernaik sare sozialen bidez iragarri duenez, gaur manifestazioa izango da Donostian 19:00etan eta bihar martxa 11:00etan Martutenera, "Euskal gazteria libre eta legala!" lelopean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun