Kanabisa substantzia estupefaziente ilegalik zabalduena da Euskal Herrian, eta 2010ean EAEko biztanleriaren %34,2k probatua zuen, Arartekok zabaldu zuenez. Era berean, marihuana legalizatzeko gehiengo soziala bada. Izan ere, "Euskadi y Drogas, 2010" txostenean jasotzen denez, Araba, Bizkaia eta Gipuzkoako biztanleen %89,2k nahi du terapietan erabiltzeko legala izatea. Autokontsumoa despenalizatu behar dela pentsatzen dutenak, ordea, gutxiago izan arren, gehiengo osoa lirateke, %54,7.
Iaz, Eusko Legebiltzarrak erabilpen medikurako klub kanabikoen legalizazioa aztertzeko batzordea eratu zuen, kontsumitzaileek 15 urtez horrelako pausoak eskatu ondoren eta Ertzaintzak autokontsumo taldeen aurka burututako eta epaitegiek ezertan utzitako hainbat sarekada ospetsuen ostean. Halere, Espainiako Drogaren Aurkako Fiskaltzak ukatu egin zuen EAEk marihuana edozein arlotan legalizatzeko eskuduntzarik izatea.
Ertzaintzak 19 urteko bi mutil atxilotu zituen herenegun Berangon 69 marihuana landare hazi, zaindu eta izateagatik. Segurtasun Sailak droga trafikoa leporatu die horregatik. Ertzaintzak zabaldu duenaren arabera, astelehenean, gauerdi aldera, Berangoko etxalde bateko hainbat auzotarrek kexak helarazi zizkioten Ertzaintzari. Horiek baieztatze aldera hurreratutako ertzainek bigarren solairuko bi maizterrek patiora hainbat loreontzi bota izan zituztela egiaztatu ei zuten, ontzietan marihuana landareak zeudela. Bertan galdekatuta mutilek landareak haienak zirela baieztatu omen zuten eta poliziek atxilotu egin zituzten. Guztira, 69 landare eta 500 euro kendu zizkieten gazteei. Dirua "legez kontrako aktibitateak" eragindakoa izan litekeela uste du Ertzaintzak. Ostean, etxebizitza miatu zuten "abokatu baten aurrean", Segurtasun Sailaren arabera. Balantza bat eta "drogaren manipulazio eta landaketarako beste tresna batzuk" aurkitu zituzten. Gazteak epailearen aurretik pasa ziren atzo arratsaldean. Argazkian, 2011n Espainiako Poliziak bahitutako landare mordoa Erandion / © Espainiako Polizia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun