Sopelako Barinatxe hondartzan lehorreratutako bost metrotako Cuvier bale-mokoaren gorpua jaso eta eraman du garabia batek, Europa Press albiste agentziak zabaldu duenez. Bitartean, Ambar Itsas Faunaren Ikerketa eta Babeserako Elkarteak animaliaren gorputz laginak eskatu ditu, heriotzak zer eragin dion jakiteko. Bale-mokoa larunbatean agertu zen lehenengo aldiz, dagoeneko hilda, arratsaldeko 20:40ak aldera, Getxoko Azkorri hondartzan, Ambar elkarteak azaldu duenez. SOS Deiak zerbitzuko lankideek eman zien horren berri. "Argi gutxi genuenez eta nahiko berandu zenez, hurrengo goizerako utzi genuen", kontatu dute. Goizean, Ambarreko kideak joan ziren bertara egoera baloratzera eta animalia flotatzen aurkitu zuten, hondartzatik 200 bat metrora. Itsasoaren zakartasunaren ondorioz, goizean zehar gorputza mugitzen joan zen eta korronteen eraginez, azkenean Sopelako Barinatxe hondartzan lehorreratu zen. Egun osoan zehar, taldeko boluntarioak inguratu ziren, gorputzaren kokapena aldatzen zen edo ez ikustera. Behin lehorrean, Sopelako Udalak hartu animaliaren gorpua erretiratzeko ardura. Argazkian, bale-mokoa / © Ambar.
Kontrakoa esan bada ere, animalia ez da balea. Bale-mokoak izurde baten neurriak eta antzeko mokoa zituen, izurdeak lez Cetacea Odontoceti familiakoa baita, hau da, odontozetoa (hortzak dituzten zetazeoak), baina Ziphiidae atalekoa. Espezie nahiko ezezaguna da, Cuvier bale-mokoa edo Cuvier zifioa ("Ziphius cavirostris"). Sakonera handiko zonaldetan bizi dira, izan ere, txibiak jaten dituzte eta urpeko arroilen inguruan aurkitzen dituzte gehien. Mundu mailan oso animalia ezezagunak dira zifioak, familia horren barruan espezie ugari daude. Ambarreko kideen hitzetan, "zorte handia dugu Euskal Kostaldean zifio espezie batzuk nahiko ohikoak baitira eta oraingoan hilda agertu bada ere, honelako animaliak bizirik ikusten ditugu maiz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun