El Columpio Asesinori dagokionez, espainolez abesten duen talde hau Iruñean sortu zen 1999an. Taldearen estiloa ezin da erraz sailkatu eta, nahiz eta rock eta pop doinuak ardatz nagusi hartu, beste estilo batzuetako erritmoak ere uztartzen dituzte, esaterako punka eta musika elektronikoa, Pixies, Sonic Youth edota The Clash taldeetan oinarritzen direla.
2001. urtean Villa de Bilbao lehiaketan bosgarren postua lortu zuten eta Benicassimeko Nazioarteko Lehiaketan Proyecto Demo 2001 saria irabazi zuten. 2002an Jaengo Lagarto Festival jaialdiko lehiaketan garaile atera ziren eta debuteko diskoa kaleratu zuten, "El columpio asesino", hain zuzen ere. 2003ko Benicassimeko jaialdian aurkeztu zuten hori.
Une horretatik aurrera taldea nabarmentzen hasi zen. Fnaceko Talentu Berriak izendatu eta "Obra Social Caja Madrid" proiekturako hautatu zuten. Azken ekimen horren eskutik zenbait espetxetan jardun ziren.
2006an "De mi sangre a tus cuchillas" bigarren diskoa kaleratu zuten eta horretan bere estilo berezia erakutsi zuten berriro ere. 2008an hirugarren lana grabatu zuten, "La gallina" izenekoa eta nazioartean aritu ziren biran. 2011n "Diamantes" kaleratu zuten, estudioko laugarren lana eta zaleek zein kritikikariek harrea ona eman zioten. Egun, Álvaro Arizaletak (ahotsa eta bateria), Raúl Arizaletak (gitarra), Iñigo Solak (tronpeta, perkusioak eta sintetizadoreak), Cristina Martínezek (gitarra eta ahotsa) eta Daniel Uleciak (baxua) osatzen dute El Columpio Asesino.
Getxoko Kultur Etxeak azken urteotan antolatu ohi duenez, etzi, larunbatean, "gazteentzako" deritzoten kontzertua izango da Algortako Ereaga hondartzako aparkalekuan. Iluntzeko 9etatik aurrera, El Columpio Asesino eta Hamaiketan taldeak jardungo dira doako saioan. Ohi bezala, txosnak izango dira bertan, udalerriko hainbat jai batzordek kudeatuta. Hamaiketan Algortako "rock alternatibo" talde euskaldunaren eskutik abiatuko da saioa. Laukote hori 2010. urtean sortu zen hirukote zela, pieza instrumentalak jotzen. 2011n abeslaria gehitu zitzaion, beren abestiak idazten hasi ziren eta debuteko maketa grabatu zuten. Horrekin Etxebarri Rock maketa lehiaketako finalera ailegatu ziren. Jarraian "Iraganeko Errautsak" bere lehenengo diskoa grabatu eta Algortako maketa lehiaketan bigarren saria eskuratu zuten. 2012 eta 2013 bitartean taldearen osaketa aldatu zen, Imanol Rodriguez banda utzita. Egun, Maren Goienagak (ahotsa), Jabi Gangoitik (gitarra eta ahotsa), Inhar Endaya (bateria eta ahotsa) eta Asier Pomposok osatzen dute laukotea. Argazkian, Hamaiketan laukote algortarra / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun