Etzi, igandea, Berangoko Nekazaritza eta Eskulangintza Azoka hartuko du Moreagako Parkeak. Azokak hogeigarren ediziora helduko da eta aurreko urteen erakusketarien kopurua mantenduko du, aurten 65 saltoki izango direla. Simon de Otxandategi dantza taldeak antolatzen duen ekimenak Euskadiko Euskal Pastelaren 15. txapelketa barne bilduko du. Egunean zehar, artisauek zuzenezko erakusketak egingo dituzte, doako dastamenak izango dira, txistulariek musikaz girotuko dute eguna eta Simon de Otxandategik zanpantzar dantza eskainiko du. Umeentzako puzgarriak ere egongo dira. Jon Celaya dantza taldeko kideak harro azaldu duenez, "edizio honetan herriko artisauen presentzia handia azpimarratu beharra dago. Azokara etorriko diren 24 artisauen erdia, gutxi gorabehera, Berangokoak dira”. Argazkian, azokako aurreko edizio bat / © Berangoko Udala.
Gastronomia atalak ere garrantzi berezia izango du, txokolatea, arrain-kontserbak, txarkuteria, eztia, pateak, gaztak, barazkiak eta txakolin salmenta-postuetan. Era berean, Etxeandia Urdulizko garagardoa erosteko aukera izango da. Barazkiak ere ez dira faltako azokan. Euskadiko Euskal Pastelaren txapelketan 14 profesionalek hartuko dute parte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun