Oporrak Bakean programarako deialdia
Atfal Getxoko Sahararen aldeko elkarteak gogorarazi nahi du familia bat falta dela haur sahararrak hartzeko egindako aurreikuspenak betetzeko. 7 eta 12 urte arteko umeak dira uda honetan Getxora etorriko direnak Oporrak Bakean programaren harira eta Udalaren laguntzaz. Ekimen horrek helburu hirukoitza dauka: osasunari, aisialdiari eta kontzientziazioari lotutakoa. "Herritarrak animatu nahi ditugu ekimen solidario honetan parte hartzera, saharar ume bat udan etxean hartzea oso esperientzia positiboa eta aberasgarria delako. Gainera oso tenperatura altuetatik urrundu ahal izatea eta osasun hobekuntza edukitzea ere suposatzen du programak" nabarmendu du Kepa Miñambres Garapeneko Lankidetzarako zinegotziak. Argibideak honako telefono eta posta elektronikoen bidez eskura daitezke: 658751359, 944660017, atfalgetxo[abildua]gmail.com eta lankidetza[abildua]getxo.net.
Bihar, igandearekin, Sahararen aldeko Getxoko VII. Herri Krosa egingo da, Algorta eta Areetako kostaldetik. Lasterketa Atfal Getxoko Sahararen aldeko elkarteak eta Getxoko Atletismo Taldeak antolatu dute, Getxoko Udalaren laguntzaz. Ekimenaren xedea bikoitza da. Alde batetik, haur sahararrak udan hartzeko Oporrak Bakean programa gogoratu nahi dute, oraindik sendi boluntario bat faltan dutela. Beste aldetik, Tindufeko (Aljeria) iheslarien kanpamenduetan dauden errefuxiatuak lagundu nahi dituzte. Horretarako, goizeko 11:10etik aurrera izena eman ahal izango da Ereaga hondartzako abiapuntuan. Inskripzioak bost euro besterik ez du kostatzen. Bildutako dirua oso osorik emango zaio herri sahararrari. Parte-hartzaileen artean opariak zozketatuko dituzte. Krosa 11:30ean irtengo da, zortzi kilometroko ibilbidea aurretik izango dela. Korrikalariak Ereagatik atera eta Portu Zaharrera joan ostean Ereaga - Bizkaiko Zubia - Ereaga bidea egin beharko dute. Argazkian, pasa den otsailaren 24an egin zuten Sahararen aldeko krosa Ormaiztegin, baita elurpean egin ere / © Sahara-kros elkartea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun