Eneko Perez getxoztarrak nazioarteko atxilotze operazioa jasan zuen 2011ko ekainaren 22an. Perez Igualdad Animal taldeko kidea da, eta "ekoterrorista" izatea egotzita, Guardia Zibilak ekaineko sarekadan atxilo hartu eta bost egunez ziegan izan zuen, inkomunikatuta. Ondoren, 19 egun pasa zituen espetxean, 2007 eta 2009 bitartean Galizian makina bat bisoi askatu zituelakoan. Enekok animaliak askatzeko hainbat ekintza publikotan parte hartu du, baina argi utzi du Galiziako hura "muntaia" hutsa dela. Operazio hartan, AEBko FBI agentzia federalak eta Europako Interpolek ere esku hartu zuten. Beste hamaika auziperatuak bezala, egun Perez behin-behineko askatasunean dago. Horretaz guztiaz, zein mugimenduak 80 hamarkadatik jaso duen kriminalizazioaz mintzatzeko, hitzaldi jira abiatu zuen pasa den ostiralean Euskal Herritik eta Estatu espainoletik, Eladio Ferreira galiziarrarekin batera. Ostiralean Bilbon izan ziren, gaur Donostian eta bihar Iruñean emango dute hitzaldia. Halere, prest daude solasaldi gehiagotan parte hartzeko. Hilaren 25era arte lotuta dituzte egun guztiak. Argazkian, Eneko Perez / cc-by Adok Perez - Voemy Factory - Diagonal.
Egun 25 pertsona daude auziperatuta, guztiak kalean, animalien eskubideen aldeko mugimenduaren aurkako sumarioan. Gehienak mugimenduko kideak dira, baina badira ere, animalien lantegietako behargin ohiak eta militante baten ama. Auzia Santiagoko epaitegian daramate eta Jose Antonio Vazquez Tain bertako epaile instruktoreak, beste gauza batzuen artean, izaera juridikorik ez duen "ekoterrorismoa" leporatzen dio hainbat laguni. Auziperatuen arabera, sumarioa irregulartasunez beteta dago eta Vazquez Tainek animaliak ustiatzen dituzten enpresarien alde egiten du. Gainera, bere epaileak onartu duenez, bere aitak granja bat zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun