Maiatzaren 30erako Greba Orokorra antolatu dute Hego Euskal Herrian ELA, LAB, ESK, EILAS, EHNE, Hiru, CGT eta CNT sindikatuek zein 60 gizarte eragile inguruk, tartean eskualdeko Erromo Duin, Plaza Beltza eta hainbat langabetu asanblada. Era koordinatu batez Itzubaltzeta / Romo mailan greba arrakastatsua izan dadin, gaur bertako greba batzordea eratzeko bilera deitu dute. Batzarra Lope de Vega kaleko kultur etxean izango da, arratsaldeko 7:30ean. Azken urteotako greba guztietan Itzubaltzeta / Romoko Greba Batzordeak paper aktiboa jokatu egin du eta bertatik Erromo Duin kolektiboa sortu egin da. Maiatzaren 30eko greba orokorra pasa den apirilaren 19an deitu zuten sindikatu eta eragileek, "Eskubide sozial eta laboral duinak. Euskal Herria eredu propio baten alde" lelopean. Lanuztea defendatu zuten, "beharrezkoa, ezinbestekoa delako, 'nahikoa da!' esateko, gobernu ezberdinetatik datozen gure eskubideen kontrako erasoen aurrean". Era berean, Euskal Herriko Eskubide Sozialen Gutuna sortzea aldarrikatuko dute. Argazkian, 2012ko irailaren 26ko greba orokorreko mobilizazioa Areetan.
Oharra:>/b> Erromo Duinek gerora azaldu zuenez, kolektibo horrek ez zuen Greba Orokorreko antolakuntzan parte hartu. Erromoko Greba Batzordea izan zen lan horietan parte hartu zuen eragilea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun