Ararteko erakundeak antolatutako ekimen xedea informazioa eskuratzeko eskubidea aldarrikatzea da. Izan ere, "oinarrizko eskubidea da eta estu lotuta dago informazio-askatasunarekin eta botere publikoa gauzatzean funtsezkoak diren printzipio batzuekin, adibidez, gardentasunarekin eta parte-hartze eraginkorrarekin. Eskubide hori giza eskubideen nazioarteko zuzenbidean aitortu dute, Europar Batasunaren eremuan, baita gure inguruko herrialde gehienetako legerietan ere", Arartekok gogoratu duenez.
2008an Europako Kontseiluak nazioarteko lehen ituna onartu zuen arlo horretan: hain zuzen, Informazioa eskuratzeko eskubideari buruzko Europako Ituna. Estatu espainolak oraindik ez du itun hori berretsi. Era berean, oraingoz, EAEn zein Estatuan ez dago legeriarik informazio publikoa eskuratzea herritarren eskubide gisa babesten duenik.
Helen Darbishire
Helen Darbishire Access Info Europe erakundeko zuzendari exekutiboa da, giza eskubideen arloan profesionala eta adierazpen askatasunean, prentsa-askatasunean eta informazioa eskuratzean espezializatua. Darbishirek eskarmentu handia du informaziorako eskubidea sustatzeko asmoz nazioartean lan egiten, bereziki Europan, Latinoamerikan eta Afrikan informazioa eskuratzeko legeen idazketan laguntzen eta legeak abiarazten.
Article 19-rekin (London eta Paris, 1989-1998) eta Open Society Institute-ekin (Budapest eta New York, 1999-2005) lan egin du, baita aholkulari gisa ere gobernu arteko hainbat erakunderentzat (Unesco, Europako Batzordea, OSCE eta Munduko Bankua). Darbishire gizarte zibilarekin lanean aritu da Latinoamerikako eta Europa ekialdeko zenbait herrialdetan, informazioa eskuratzeari buruzko legeria onartu, berritu eta abiaraz dadin sustatzeko. Informazio Askatasunaren Defendatzaileen Sarearen sortzaile eta oraingo presidentea da. Helen Darbishire Historian eta Zientzien Filosofian lizentziaduna da Durham-eko (Erresuma Batua) Unibertsitatean. Madrilen bizi da eta gaztelaniaz, ingelesez eta frantsesez hitz egiten du.
Joserra Ortiz Txipio Bai Barrika, Gorliz eta Plentziako elkarte ekologistako partaidea informazio eskubideari buruz mintzatuko da gaur arratsaldean Bilbon. Ortizek "Informazioa eskuratzeko eskubidea, herritarren eskubide gisa: hedabideen eta gizarte zibileko erakundeen eginkizuna" mahai-inguruan parte hartuko du, Txipioko paduraren defentsan bertako udalen eta beste administrazioen txosten publikoak eskuratzeko bizi izan dituzten estutasunak hizpide izango dituela. Ekimena, arratsaldeko 6etan abiatuko da Bilboko Zazpi Kaleetako Burtsa zentro zibikoan eta Ararteko erakundeak antolatuta dago. Lucia Martinez Odriozola Kazetarien Euskal Elkarteko presidente algortarra eta Carlos Barcina Arartekoko ingurumen arloko koordinatzailea ere mahai-inguruan arituko dira. Moderatzailea Arantza Lezamiz izango da. Aurretik, Helen Darbishire Access Info Europe erakundeko zuzendari exekutiboak hitzaldia emango du. Sarrera doakoa izango da, jarleku guztiak bete arte. Argazkian, Joserra Ortiz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun