Hasieratik estilo bizia erakutsi du Fuchsek eta bere musikan bluesa, rocka eta soula uztartzen ditu. Etta Jamesen eta Aretha Franklinen mailako artista handiak hartzen ditu oinarri eta kritikoek Janis Joplin abeslari handiarekin parekatzen dute. Izan ere, artista hori antzeztu zuen Fuchsek "Love, Janis" Broadwayko musikalean.
Egun arte, hiru disko kaleratu ditu: "Lonely for a Lifetime" (2003), "Live in NYC" (2007) zuzenekoa eta "Love to Beg" (2011). Uztailaren 9an kaleratuko den "Bliss Avenue" gehituko zaio bere diskografiari eta Getxoko jaialdira joango diren zaleek horren kantak gozatzeko aukera izango dute. Ziuraski, Fuchsen saioa ikusmin handia sortuko du, ez bakarrik disko berria aurkeztuko duelako, baita iaz azken orduan bertan behera utzi behar izan zuen jaialdi algortarrean programatutako kontzertuagatik ere.
"Bliss Avenue"rekin beste norabide bat hartzen du Fuchsen jarduerak, baina ez estiloari dagokionez. Disko berriko hitzek, eduki humanista dutenek, erakutsi dute Fuchsen bilakaera musikagintzan. Kantek oso istorio pertsonalak kontatzen dituzte. Horien protagonistek sufrimendu handia dute eta zorionaren bila dabiltza, baina hori lortzeko guztiz kontrakoa eragiten duenaz baliatzen dira.
Dana Fuchs abeslariak "Bliss Avenue" disko berria aurkeztuko du Getxoko 25. Nazioarteko Blues Jaialdian, antolatzaileek zabaldu dutenez. Estatubatuarra, egungo blues eszenako etorkizun handiko ahotsa uztailaren 19an ariko da Getxo Bluesean, hileko 18tik 20ra Algortako Biotz Alai plazan izango dena. Kontzertuetarako sarrerak maiatzaren 31tik aurrera egongo dira salgai. Dana Fuchsek (1976, New Jersey) jarduera profesionala New Yorken hasi zuen John Diamond gitarra-jotzailearekin eta berarekin Dana Fuchs Band sortu zuen. Epe laburrean hiriko blues klub garrantzitsuenetan jotzen hasi zen, batzuetan artista handiekin: John Popperrekin, James Cottonekin eta Taj Mahalekin, besteak beste. Garai horretan ere konposatzen hasi zen. Bere abestiak zenbait filmetan agertu dira, esaterako "Across The Universe"n. Argazkian, Fuchs / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun