Sopelako Udalak diziplinazko espedientea zabalduko dio udaltzain bati, komisarian tiro batek ihes egin ziolakoan
Udaltzain bati diziplinazko espedientea zabaltzea erabaki du Sopelako Udalak, ustezko falta larri bat egin duelakoan. Tokiko iturriek azaldu dutenez, apirilaren 2an jazo zen gertaera, 08:05ean Sopelako Udaltzaingoaren egoitzan. Aipatu udal azpiegituretan, suzko arma baten deskargaren ondorioz eztanda gogor bat entzun zen ordu horretan. "Armazainaren alboko horman inpaktu bat topatu zen", gaineratu dutenez. Arma erabiltzen ari zen udaltzainak gertaeraren inguruko eginbide bat zabaldu zuen, Ofizial Ondoko Operatiboak hala eskatu ostean. Udal arduradunek diotenez, bertan, udaltzainak esaten du Segurtasun Protokoloa jarraitzerakoan, “armak tiro egin zuela”, eta beraz, eztanda kliskagailua sakatu ostean gertatu zela. Haatik, Sopelako Udal Gobernuak aipatu gertaera "zabarkeria edo zuhurtziagabekeriagatik" gertatu zela uste du. Udal arduradunen arabera, "eztanda gertatu zenez, udaltzainak ustez ez zuen Segurtasun Protokoloa bete, kliskagailua sakatzerakoan bala bat errekamaran zegoelako, eta beraz, ustez ez zuen erekamara hutsik zegoela behar bezala begiztatu". Argazkian, Sopelako udaltzain auto bat.
"Gainera, ez zuen bestelako asegururik aktibatu eztanda ekiditeko (horren bidez deflagrazioa ekidin ahal izango zen, perkusio mekanismoa baliogabetuko lukeelako)", gehitu dutenez. Udaltzainek jarraitu behar duten Segurtasun Protokoloak honako urratsak zehazten ditu: kargadorea atera, labaindera atzera bota, errekamara hutsik dagoela egiaztatu, labaindera askatu, hutsean tiro egin eta kargadorea sartu. Horregatik guztiagatik, eta ustezko falta larri bat egin duelakoan, Sopelako Udalak diziplina espediente bat zabaltzea erabaki du aipatu udaltzainari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun