Enplegu duinen, eskubide sozialen eta ondasunen banaketaren aldeko bi martxek zeharkatuko dute larunbatean Uribe Kosta eta Erandio

Ukberri 2013ko maiatzaren 8a

"Eskubideen marean hartu Uribe Kostako 3 olatuak" lelopean, larunbat honetan, maiatzak 11, enplegu duinen, eskubide sozialen eta ondasunen banaketaren aldeko bi martxek zeharkatuko dute eskualdea. 10:30ean abiatuko dira Erandioko metro geltokitik (Erandio, Leioa eta Itzubaltzeta / Romo) eta Urdulizeko udaletxetik (Algorta, Berango, Sopela, Urduliz, Barrika, Plentzia, Gorliz eta Lemoiz), eta 13:00etan elkartuko dira Algortako Teiletxe plazan, ondoren manifestazio handi batekin bukatzeko. Oraingoz, Uribe Kosta eta Erandioko 24 eragilek bat egin dute manifestuarekin eta martxarekin eta larunbatera bitartean atxikimenduak jasotzen jarraitu dute, Enplegu duin, Eskubide Sozial eta Ondasunen banaketaren aldeko Uribe Kostako Koordinakundeak adierazi duenez. Martxarako motorrak berotzeko, bihar, osteguna, Lanbideren Areetako bulegoen aurrean eskualde mailako mobilizazioa egingo dugu, 12:00etan. Argazkian, martxoaren 16an aurkeztu zuten Enplegu duin, Eskubide Sozial eta Ondasunen banaketaren aldeko Uribe Kostako Koordinakundea / © Uribe Kostako Koordinakundea.

"Orain arte manifestua osatzen eta atxikimenduak jasotzen egon gara. Une honetan beste urrats bat ematera goaz, guztion artean osatutako errebindikazio taula borrokarako tresna bilakatuko dugu, eta larunbatean ahalik eta jende gehien mugitzea berebiziko garrantzia izango du maiatzaren 30eko hurrengo geltokiari begira", azaldu du Enplegu duin, Eskubide Sozial eta Ondasunen banaketaren aldeko Uribe Kostako Koordinakundeak.

Aipatu ekimenen deitzaileen artean honakoak daude: Erandioko Langabetuen Asanblada, Erandioko Gazte Asanblada, Erandioko Udaleko Langile Batzordea, Leioako Langabetuen Asanblada, Leioako Gazte Asanblada, Leioan Bagabiz, Leioako Udaleko Langile Batzordea, Erromo Duin, Erromoko Hintxak, Itzubaltzeta / Romoko Jai Batzordea, Itzubaltzeta / Romoko Auzokideen Elkartea, Berangoko Langabetuen Asanblada, Sopelako Plaza Beltza kultur-gunea, Urdulizko Iraupen elkartea, Plentzia eta Gorlizko Gazte Asanblada, ELA, LAB, STEE-EILAS, ESK, Ernai, Gazte Komunisten Kolektiboa, Bilgune Feminista, Uribe Kostako LZPren aurkako asanblada eta Uribe Kostako M15 Mugimendua. Horretaz gain, ekimenekin bat egin dute ondoko enpresatako LABen ordezkariek: Mastitxu Leioako udal euskaltegia, DHL Leioa, Cables y Alambres (Erandio), SMA Sistemas Mecanicos Avanzados (Erandio), Mecaner (Urduliz), Arlan (Erandio), Cocina Central Goñi (Erandio), Embalatap (Sopela), Dismodel (Sopela), Vicrila (Lamiako), Getxoko Udala eta Sanitas Loramendi (Leioa).

Enplegu duin, Eskubide Sozial eta Ondasunen banaketaren aldeko Uribe Kostako Koordinakundeak zabaldutako informazio orria (jpg)

Jendartea

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun