Algortarrak berezitsuak direla eta Algortako Bertsolari Eskola (ALBE) familia handia eta konplexua osatzen duela jakina zen eskualdean. Halere, orain arte gutxik uste zuen legearen bi ertzetatik ibiltzen zirela, haien benetako jarduerei buruz 'omerta' ezarriz. Orain, dena agerian utziko dueneko mehatxua inork ez duela bota arren, 'Cosa Nostra'-renak azalduko dituzte kultur mafiako kideek. Horretarako, bi capo ekarriko dituzte bihar, nora eta Algortako Kasinora, familien arteko bilkura alaitu dezaten. Mafiaburuak Sustrai "umetxoa" Colina eta Unai "patillak" Iturriaga dira, dakiten guztia abestuko dutenak, metraileta askatu gabe. Bilkura fin hori gaueko 10etan hasiko da eta bertaratzeko eroskeria-kopurua gutxienez 25 eurokoa izan beharko da. Ordainketa erak finkatu eta lekua erreserbatzeko 605 704 385 telefonora deitu edo albegetxo[abildua]gmail.com posta elektronikora idatz daiteke. Janzkera egokia erabiltzea agindu du 'il padrino'-k. Argazkian, gonbidatuetako batzuk / cc-by-nd Asraffirdauz Abdullah - SrapDsign Photographics.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun