Uribe Kosta eta Erandioko M-15 mugimenduaren asanbladak gaur "Zuen etekinak, gure miseria!" lelopean Bilbon egingo den manifestazioan parte hartzera deitu du. Martxa Jesusen Bihotz plazatik irtengo da, arratsaldeko 6etan. Izan ere, datorren asteazkenean bi urte beteko dira Espainiar Estatuan zein Hego Euskal Herrian aldarrikapen mugimendu hori jaio zenetik. Bizkaiko M-15 mugimenduaren iritziz, "ekonomiaren eta legeen arloetako politikak direla-eta, egungo egoera sostengaezin eta jasanezin" bilakatu dela. Horregatik, "berriro ere, plazak eta kaleak topagune gisa" aldarrikatu nahi dituzte. “Gure eskubideak eta askatasunak murrizten dituzten arazoei egiazko konponbidea guztion artean aurki dezakegula sentitzen dugun lagun guztien bilgune” izan daitezen. Uribe Kostan, 2011n udalerri mailako asanbladak sortu ziren Sopelan, Leioan eta Getxon. Erandion ere batzarren bat izan zen. Guztira, 200 bat lagun bildu ziren hastapeneko batzar haietan. Egun, berriz, antzinako asanblada guzti horiek Uribe Kosta batzar bakarrari lekua utzi diote, parte hartzea egonkortu da eta 10-20 pertsona bildu ohi dira ostegunero 19:30ean, Areetako Xake plazan. Halere, gehiago izaten dira antolatzen dituzten ekimenetan. Argazkian, Agate Deuna suminduaren abesbatza pasa den otsailean / © Uribe Kostako M-15.
2011ko maiatzaren 15ean jendea kalera masiboki irtenagatik, orduz geroztik gizarte eskubideak espoliatzeko prozesua azkartzen eta gogortzen joan da, eta neurri neoliberalak nagusitzen jarraitzen dute. Jendeak sentitzen duen nazka eta etsipena aldarrikapen indar bilaka dadin nahi du mugimenduak, eta besteren artean, inposatutako legeen aurrean desobedientzia zibila gauzatzen hasteko deia egin dute. Ildo horretan, eredu energetiko alternatiboak, arrazakeriaren aurkako aldarrikapenak, ekimen antimilitaristak, zorraren aurkakoak, lan duinaren aldekoak, gizarte eskubideak, berdintasuna eta etxebizitza eskubidea babestu nahi dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun