Urdulizko Basartena tabernak seigarren urtez antolatu du film laburren lehiaketa. Lanak bihar arte entregatu ahal izango dira, DVD formatuan, Elortza kaleko 19. zenbakiko ostalaritza establezimenduan. Finalerako aukeratutako hamabi film laburrak, berriz, Urdulizko kultur etxean egongo dira ikusgai, uztailaren 27an, gaueko 10etan. Era berean, Bizkaiko Abokatuen Bazkunean proiekzioa izango da, eta baita Plentzia Telebistan ere. Koldo Serra, Borja Crespo eta Aitor Elorriaga zinegileek zein Patxi Urkijo eta Amaia Nerekan Ikus-Entzunezko irakasleek ekaineko ostegunetan batu film labur guztiak ikusi eta 12 hoberenak aukeratuko dituzte, irabazleen izenak aipatutako uztailaren 27an jakinaraziko dituztela. Argazkian, Basartena tabernako arduradunak Javier Bilbao Urdulizko egungo alkatearekin, orain bi urteko lehiaketaren aurkezpenean / © Urdulizko Udala.
Sariei dagokienez, fikziozko lanik onenak 600 euro eta garaikurra jasoko ditu; baita animaziokoak ere. Zine eskoletako zein euskarazko ikus-entzunezkoen artean, berriz, obra bana sarituko dute; 300 euro eta garaikurrarekin. Lehiaketaren oinarriak www.basartena.com webgunean daude ikusgai.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun