Gaur, Algortako Bilgune Feministak Gasteizko andra baten ustezko erailketa salatzera deitu duenean, Getxoko Udaltzaingoak emakumeen aurkako bortxakeriaren kasu berri bat zabaldu du. Udal iturrien arabera, Getxoko Udaltzaingoak 32 urteko gizon bat atxilotu zuen atzo, igandean, goizaldeko 2:30ak aldera, genero indarkeriaren ustezko delitua egiteagatik. Aurretik, biktimak berak deitu zuen Udaltzaingo-etxera agresioa salatzeko. Eztabaida baten ondoren, bere bikotekideak eraso egin ziola esan zien emakumeak. Udaltzainak udalerriko etxebizitzara joan ziren eta han aurkitu zituzten emakumea eta gizona. Poliziek emakumea Gurutzetako erietxera eraman zuten eta han arinak ziren zauriak sendatu zizkioten. Ustezko erasotzailea atxilotu zuten eta Getxoko Udaltzaingo etxera eraman zuten, ondoren epailearen esku uzteko helburuarekin. Argazkian, emakumeenganako indarkeriaren kontrako elkarretaratzea Algortan, artxiboko irudian.
Keltse Eiguren Berdintasun Zerbitzuko zinegotziak ustezko erasoa gaitzetsi du eta gogoratu du “indarkeria sexista giza eskubideen urraketa larria da”, eta aldi berean tratu txar fisiko edo psikiko jasaten dituzten emakume biktimak Gizarte Zerbitzuetara (944 660 151) jotzeko animatu ditu, "han egoeratik ateratzeko laguntza emango baitiete". Eigurenek gogoratu du Udaltzaingora (944 660 202) edo Ertzaintzara (944 063 420) ere joan daitezkeela; baita Eusko Jaurlaritzaren tratu txarren biktimen telefono zenbakira (900 840 111) eta SOS Deietara (112) ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun