Goizeko 5:45ean, esna dago Ondarroan Urtza Alkorta gazte zigortua atxilotu ez dezaten sortutako Aske Gunea, herri edo zubi harresia. Asko gozaltzen ari da orain. Beste asko berbetan da, goitik behera estalita hotzari aurre egiteko, asko eta asko mantetan bilduta. Balizko ertzainen etorrera dela eta 4:30ean esnatu dituzte antolatzaileek, lasaitasunez baina artez, zubia har zezaten. Bertan Alkorta zaindu eta irmo bere inguruan eusteko, "baina inolako probokaziotan erori gabe", mikrofonotik ohartarazi dutenez. Ehunaka lagunek erantzun diote lasai-lasai herri harresia zubian zehar osatzeko asmoz. Ertzainen furgoneta bi irten dira Mutrikutik, baina ez dira Ondarroara heldu, atzerako bidea hartu dutelako. Patruila bat besterik ez du zeharkatu Calatravak eginiko zubia, distantziaz. Gauean zehar, beste alarma txiki bat sortu da goizaldeko 2ak aldera, Mutrikutik ere ertzainen patruila bat hurbildu denean. Hor ere, Jendea altxatu, zubira igo eta han lotu dira baieztatu arte ertzainek alde egin eta Ondarroako ertzain-etxera joan direla. Argazkian, Zubi Zaharreko goiko aldea, 2etako zubi harresian.
Bestalde, ertzainek kontrol bat jarrita zuten gaueko 11:30ak aldera Berriatuan eta hainbat auto gelditu eta bidaiariak identifikatu dituzte. Era berean, gutxienez beste hiru laguni dokumentazioa eskatu eta kostaldeko bidetik alde egiteko esan diete, goizaldeko 3ak pasatuta. Internetekin arazoak ditugula, ordu batzuk barru eskainiko ditugu Urtza Alkortari egindako elkarrizketa zein Uribe Kostatik etorritako hainbat lagunen lekukotasunak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun