Sopelako Udalak solasaldi ziklo berri bat abiatuko du bihar, ostegunean. "Sopela solasean" hitzaldien bidez, aurrerantzean, sopeloztarrek hilero "hitzaldi bat euskaraz jasotzeko" eta "gozatzeko aukera" izango dutela nabarmendu dute udal iturriek. Lehen saioan, Eibarko Eta Kitto! euskara elkarteko hainbat kide ekarriko dute,“Euskararen motibazioak eta jarrerak” hitzaldia emateko. Kurtzio kultur etxean izango da hori, arratsaldeko 7etan, sarrera doakoa dela. Ekimenaren xedea euskararekiko motibazioa indartzea izango da eta "batik bat gurasoei eta umeekin lan egiten duten lagunei zuzenduta egongo da". Bertan, honako galderei erantzunak bilatzen saiatuko dira: "Gure umeek zergatik ez dute euskara erabiltzen? Helduok gaitasuna badaukagu, zergatik ez dugu egiten? Zergatik da horren garrantzitsua gurasoen eredua? Euskaraz jakin barik ere, zergatik da garrantzitsua jarrera positiboa erakustea?". Horretaz gain, Pako Aresti idazle eta kazetari ezagunak ere hitzaldia emango du bihar zortzi. Argazkian, Pako Aristi / © Erein argitaletxea.
Aipatu bezala, maiatzaren 30ean beste hitzaldi interesgarri bat izango da Sopelako Kurtzio kultur etxean, 19:00etatik aurrera. Pako Aristi idazle eta kazetari ezaguna izango da gonbidatua, eta “Euskara, hizkuntza bat bere bakardadean” solasaldia eskainiko du. Aristik azalduko duen legez, "bi hizkuntza hegemonikoen erdian, menpeko hizkuntza baten egoera petrala bizi du egun euskarak. Normalizazioaren etiketaz mozorroturiko anti-politika baten ondorioz, piramide sozialean desagertzen ari da, eta laster kaletik ere bai. Botere politiko propiorik gabe euskara "ad eternam" izango da mendeko hizkuntza, hizkuntza morroitua, sinbolikoa bere hutsean, fosil bihurtzeko bidean".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun