"Urkulluk politikak aldatzen baditu eta erreforma itogarriei aurre egiten badie, gizartearen babesa izango du. Gizarteari kontra egiten badio, ordea, ez du horrenbeste aldarrikatzen duen egonkortasuna lortuko", ohartarazi zuen Etxaidek.
Haren esanetan, EAE "ez dago 1.200 milioi euroko murrizketetarako, ezta soldata murrizketetarako, gizarteak protagonismoa hartu behar du, erabakigarria izan dadin".
Zentzu horretan, maiatzaren 30ean Hego Euskal herrian deitu duten greba orokorrean parte hartzeko deia egin die herritarrei, EAJren Jaurlaritzak hartu dituen erabakiak "ez direlako eraginkorrak".
Ainhoa Etxaide LAB sindikatuaren idazkari nagusiak hitzaldia emango du bihar, osteguna, Algortan. LAB sindikatuak jakinarazi duenez, hitzordua Algortako Villamonte kultur etxean jarri dute, arratsaldeko 7etan. Bertan, datorren maiatzaren 30ean greba orokorrarekin bat zergatik egin behar den azalduko du Etxaidek. Era berean, Euskal Herrian "eskubide sozial eta laboral duinak" defendatuko duen eredu propioaren beharraz mintzatuko da. Bitartean, LAB sindikatuaren idazkari nagusiak gutuna bidali zion pasa den astean Iñigo Urkullu lehendakariari, Radio Euskadin egin zioten elkarrizketan adierazi zuenez. Aipatu mezuan, politika sozioekonomikoa aldatzea eskatu zion lehendakari jeltzaleari. Etxaideren aburuz, euskal industria "ekimen pribatuaren esku uzten ari direlako doa pikutara". Argazkian, Ainhoa Etxaide murrizketen aurkako protesta batean, artxiboko irudian / cc-by-sa LAB sindikatua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun