MUSSCHE from Angel Aldarondo // Kosmikar on Vimeo.
Kirmen Uribe idazle ondarrutarrak “Mussche” eleberriaren nondik-norakoak azalduko dizkie gaur, osteguna, eskualdeko literatura zaleei. Izan ere, Egizu Getxo Euskaldun! elkarteak antolatu ohi duen Uribe Kostako Irakurzaleen Txokoak aipatu lana aukeratu zuen irakurri eta hausnartzeko. Hitzordua, arratsaldeko 8etan jarri dute Algortako Aldai patronatuan. Susa argitaletxeak iaz inprimatutako liburuan, Robert Mussche idazle eta kazetari flandiarraren bizi pasarte garrantzitsuak kontatzen ditu Uribek, baita horiek ezagutzeko egindako ikerketaren narrazioa ere. Tramak 1936ko Gerra eta Bigarren Mundu Gerra arteko giro nahasiak izango du jokalekua, Euskal Herriarekiko hurbiltasun puntua Karmentxu Cundin bilbotarraren historiak emango diola. Cundin Santurtziko portutik irten zen gerrako haur gisa, eta Musschek eta Vic Opdebeeck bere emazteak etxean hartu zuten beren gain. Mussche, Flandriako alderdi sozialistako kidea izan zen eta gerora okupazio alemanaren aurkako erresistentzian aritu eta kontzentrazio eremuak ezagutu zituen. Herman Thiery idazlearekin laguntasun harreman estua izan zuen. Berak idatziko zuen Mussche gogoan izateko lehen lana: "In Memoriam Robert Mussche", 1946an. Argazkian, Kirmen Uribe Irakurzaleen Txokoan, 2009an, orduan "Bilbao-New York-Bilbao" liburuaz mintzatu zela / cc-by Egizu!
"Mussche"-rentzat Juul Saria
Kirmen Uribek berak astelehenean jakinarazi zuenez, Euskal Herriko ikastoletako 16 eta 18 urte bitarteko ikasleek "Mussche" eleberria hautatu dute irakurri dituzten liburuen artean gustukoen, Nafarroako ikastolen elkarteak antolatzen duen Juul izeneko kanpainaren barruan. Juul saria Gregie de Meyer idazle eta ilustratzaile flandriarraren omenez jaio zen (1951-1998), hark idatzitako ipuin bateko protagonista baita Juul, bullinga jasaten duen ume baten istorioa. Adin desberdinetan, ikasleek ikasturtean zehar irakurri dituzten liburuen artean hautatzen dute gehien atsegin izan zaien liburua.
Liburuaren aurrerakina (© Angel Aldarondo - Kosmikar)
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun