Bestalde, Epic telebistak antolatutako 2012 urteko abenturazalerik onenari saria ere irabazi berri du. Kepa Acerok 18 urterekin ekin zion surflari profesionala izateari eta gazte mailan Europako txapela irabazi zuen. Urteetan, Europako hamar surflari onenen artean mantendu zen. Duela urte batzuk, lehiaketak alde batera utzi eta surfa beste era batera bizitzeko apustua egin zuen. Kirol profesionaltzat jo beharrean, bizitzeko, mundua ikusteko, kulturartekotasuna lantzeko eta hezteko modu bat bezala ulertu zuen surfa eta bide horretan, ikus-entzunezko dibulgazio lanak sortzeko apustua egin zuen.
Gauzak horrela, norabide hori hitzaldietan ere eskaintzen du Kepak, surfaren beste ikuspuntu bat erakusten duela. Surfaren hastapenetan abentura-kirol horrek naturarekiko eta beste kulturekiko harremanak zuen garrantzia berreskuratuz eta erakutsiz. Bidaietan bizi dituen esperientziak ere elkarbanatzen ditu publikoarekin, hala nola motibazioak eta ilusioak, baina baita beldurrak, borrokak eta bakardadea ere, besteak beste. Kirolaren baloreak eta ametsak egi bihurtzeko gaitasuna ere jorratzen dituen gaietako batzuk dira.
Abian kultur elkarteak antolatuta, Kepa Acero surflari algortarra arituko da gaur, Abian elkarteko tabernan, Algortako Bidebarri kalean. Bertan, arratsaldeko 7:30etik aurrera, bere esperientziak, abenturak eta ikuspuntuak emango ditu algortarrak, nolabait "surfaren beste aldea" erakutsiz. Solasaldian, Acerok 5 Olatu 5 Kontinente proiektuaren nondik norakoak azaldu eta azken urteetako bidaietan bizi dituen esperientziak kontatuko ditu, besteak beste, tartean Unai Basurko eta Pakea Bizkaiaren eskifaiarekin Antartikara berritan eraman duena. Argazkian, surflari algortarra Antartikako Decepcion uhartearen aurrean / © Kepa Acero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun