Alderdi politikoekiko bileran (eta azken asteetan ere) ikusi dugu EAJ hasi dela tonua jaisten, eta orain arteko harrokeria apaltzen hasi zaiola. Nire kolkorako dut ez ote den izan estualdiak behartuta, halabeharrez egin behar izan duen moldaketa, eta ez konbentzimenduz egindako aldaketa. "A la fuerza ahorcan" esaten da gaztelaniaz. Badirudi azkenean, bost hilabete pasatuta ohartu egin direla ez dutela aurrera egiterik bakarrik egonik, eta hiru urteren buruan berriz gobernura heldu hutsak ez dituela arazoak konpontzen berez. Koiunturaren gordinaz jabetu dira estrainekoz.
Eta gogotik ala gogo txarrez, kontua da EH Bilduk aspalditxo plazaratu zituen gai nagusiak (eta gai horietan dituen jarrera aurrerazaleak) kontuan hartzen hasi dela EAJ, aurretik zeukan jarrera irmotik nola edo hala mugitzen hasita.
Agintariei eska dakiekeena agintzea da. Eta agintzen duenari exiji dakiokeena da gainontzekoak aintzat hartzea. Ez bakarrik legebiltzarrean dauden alderdi politikoak. Bestelako indar politikoak, eragile sozialak, sindikatuak eta herri eragileak ere aintzat hartu behar ditu.
Gaztelaniaz esaten da, "todo para el pueblo, pero sin el pueblo”, baina jatorrizko esaldia da "tout pour le peuple, rien par le peuple", hau da, “dena herriarentzat, baina ezertxo ez herriarengatik”. Ez dadila izan Jaurlaritzaren leloa.
Alderdi politikoekin izandako bileraren hasieran eta amaieran kamara eta kazetari ugari zeuden hamar emakume-gizoni begira, gizon-emakume horiek izan balira bezala eguneko protagonistak. Protagonismoa, ordea, kamaren atzealdean dago, egiazko soluzioen zain dauden milaka eta milaka pertsonen aldean.
Prentsaren ikuspuntutik ikusgarriagoa izan daiteke grabatzea nola igotzen dituzten hamar eskailera hamar politikarik. Baina ez da estetika garaia. Etika garaia da. Eta etikoki fokoak jarri behar ditugu langileei eta langabeei begira.
Laura Mintegi idazle, irakasle, kazetari eta legebiltzarkide algortarrak atzo bere blogean argitaratutako artikulua.
[© Laura Mintegi] Agintariei eska dakiekeena agintzea da. PPk lehendakariari aurpegiratu zionean arbitro hutsa izaten ari zela eta bere eginkizuna zela proposamen zehatzak mahairatzea, lehendakariak ukatu zion arbitroa zenik; dinamizatzailea zela esan zion. Eta orduan begitandu zitzaidan ez ote geunden laguntza-talde batean terapia egiten, talde dinamikaren bidez elkarrenganako enpatia bilatu nahian, eta ez alderdi politikoen goi mailako bileran larrialdi egoera bati erantzunak emateko ahaleginean. "Por exceso o por defecto" egin daiteke politika, gure frontoietan ikusten dugun “pasa” eta “falta”. Falta da burura etengabe datorkidan hitza. Falta da jakitea zein den Jaurlaritzak daukan proposamen zehatza. Falta da determinazioa egoeraren larriari aurre egiteko. Falta da lidergoa, ideia argiak, ausardia, besteen posizioetara hurbiltzeko saioa. Falta da arreta jartzea kaletik datorren eskaerari. Falta da handinahia alboratzea. Argazkian, Laura Mintegi Lakarra / cc-by-sa Euskal Herria Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun