Ibaizabalaren bi ibarrek istorio propioa dute eta modu ezberdinean bizi izan zuten 90eko hamarkadan emandako eraldaketa sozial eta ekonomikoa. Bietan ordea, musikak garrantzia berezia izan zuen, musika talde ugari sortu baitziren: Eskorbuto, Zarama, Los Clavos, Parabellum eta beste hainbeste. Musika tresna gisa erabiliz, historian arakatzea proposatzen du 160 metros egitasmoak.
Ikusentzunezko egitasmoa bost kapituluk osatuko dute eta banan banan ikusi ahal izango dira interneten eta ETB-n. Ondoren, guztiekin Zinebin aurkeztuko den dokumentala osatuko dute. Oraingoz, lehenengo atalaren emanaldiak eskainiko dituzte herriz herri. Dagoeneko, Bilbon, Portugaleten eta Algortan proiekzio bana lotuta dituzte. Algortakoa, bi aste barru izango da, ekainaren 6an.
Proiektua aurrera atera ahal izateko crowdfunding-a erabili dute eta horrela, 250 partikularren finantziazioa lortu dute.
"160 metros: una historia del rock en Bizkaia" espainolezko web dokumentalaren lehen kapitulua bihar estreinatuko dute 160metros.com ekimeneko atarian. Halere, gaur bi aurre-estreinaldiak izango dira. Lehenengoa, prentsarako eta bigarrena, arratsaldeko 8:30ean, Bilboko Bilborock aretoan ospatuko duten aurkezpen festa, Zazpi Kaleetako Gozo-txokon jarraituko dena. Festan, proiekzioaz gain, hainbat DJ eta musikari izango dira, tartean, Dead Broncos algortarrak. Festa horrekin, Alvaro Fierro eta Joseba Gorordo zuzendariek eta Diego Urruchi eta Raul Lopez ekoizleek sarituko dituzte proiektua abian jar zedin diru ekarpena egin zuten lagun guztiak. Dokumentalaren asmoa Bilbo eta Bizkaiak 90eko hamarkadan izandako eraldaketa soziala bost ataletan azaltzea da. Izena, ordea, Bizkaiko Zubiaren luzerari egiten dio erreferentzia, 160 metrok bereizten baitituzte Ezkerraldea eta Uribe Kosta, punka eta Getxo Sound, alegia. Argazkian, filmazioaren irudi bat, Iñaki Elorriaga Getxoko Kultur Etxeko kideari elkarrizketa egiten / © 160 metros.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun