Ertzaintzaren oldarraldiak eta identifikazioak izan dira Itzubaltzetan eta Areetan
Lehen greba orokorra izan da gaur gazte askorentzat. Goizean, 30 ertzain inguru Romo-Artatza institutuan zeuden ikasleei oldartu zaizkie, Avanzadako errotondan auto ilara luzeak sortuz. Jarrera hori ikusita, grebaren aldeko piketearekin bat egitea erabaki dute neska-mutilek, holako deialdi batean Itzubaltzetan aspaldidanik ikusi den jende multzoa osatuz. Grebaren aldekoek Lanbidek Areetan duen bulegoa okupatu dutenean ere, bertara sartu dira ertzainak. Hasiera batean, isiltzeko esan diete piketeko kideei poliziek eta haiek "Murrizketak Ertzaintzan" aldarriaz erantzun diete. Iñigo Cabacas zenaren aldeko oihuak ere izan dira. Irtetean, baina, borrekin kolpatuz oldartu zaizkie ertzainek, hainbat zauritu eraginez eta lagun bat erretenituz. Cabacasen hilketa gogoratu dien lagun bat jipoitzera joan da Ertzaintza. Ez dute lortu eta hainbat lagun kolpatu eta beste bat hartu dute. Akabuan, askatu egin dute Areetan atzemandako gaztea. Sorbaldan borraz eman diote hartu aurretik. Ondoren, identifikatu eta irain salaketa jarri diote. Beste lagun bat ere identifikatu du Ertzaintzak. Itzubaltzetan gaurko egunaren jarraipena %95ekoa izaten ari da greba batzordearen arabera. Areetan, berriz, aurreko deialdietan baino gehiagokoa. Argazkian, Areetan harrapatutako gazteetako bat.
Oldarraldiak oldarraldi, Areetako piketea bankuak apaintzen ibili da. Itzubaltzetako BBVA ere okupatu dute. Bitartean, ELA pikete martxa egiten aritu da Areetatik Leioara. Areetako osasun-etxean, berriz, murrizketen aurkako eserialdia egin dute piketeek, "Osasungintzan mozteak heriotzak" dakarrela ohartaraziz. Piketeak Areetako batzokian ere sartu dira: informazioa eman eta tabernariak euskaraz ez zekiela erantzun die. Itxiko zuen galdetuta baietz esan die eta pintxoak eroan dituzte. Eserialdia ere egin dute bertan, "EAJ-PP gauza bera da. Murrizketak, Ertzaintzan" aldarrien artean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun