Eskubide sozial eta laboral duinak aldarrikatzeko hainbat mobilizazio izan dira goizean Algortan, Itzubaltzeta / Romon eta eskualdean. Sindikatuen arabera grebaren jarraipena oso zabala izan da eta Eusko Jaurlaritzaren ustez, %20koa. Halere, goizeko ekimenekin ez da bukatu greba jardunaldia, eskualdeko greba batzordeek bost manifestazio eta hamaika mobilizazio antolatu dituztela. Arratsaldeko 4etan, auto-karabanak antolatu dituzte Leioako osasun etxetik herrian zehar eta Berangoko anbulategitik Plentziarantz. 16:30ean, ordea, Itzubaltzeta / Romoko Ondarretako markesinan jarri dute hitzordua. Gazte erandioztarrek eztabaida izango dute Altzagako metro geltokian 17:45ean eta ondoren,18:00etan, manifestazioak hasiko dira. Algortakoa zaratatsua izango da, Telletxe plazatik abiatuta; Leioan, 18:00etan, Bulebarretik; Erandion, 19:00etan manifestazioa, metro geltokitik abiatuta; eta Itzubaltzeta / Romon, 19:30ean, Santa Eugenia plazatik. Plentzian ere manifestazioa egingo dute 18:00etan Astilleroraino, oraingo honetan Berango, Sopela, Urduliz, Barrika, Plentzia, Gorliz eta Lemoizko greba batzordeek deituta. Bestalde, Getxoko enpresariak batzen dituen Getxo Enpresa elkarteak, ordea, greba eguna aukeratu egin du bere 8. Topaketa ospatzeko. Algortako Igeretxe hotelean egingo dute arratsaldeko 8:45etik aurrera. Hainbat enpresa eta erakundeetako ordezkariak izango dira, "flower power" estetikako jaian, ardo dastaketan eta koktel-afarian, tartean Itziar Epalza Urkiaga Eusko jaurlaritzako Turismo sailburuordea. Argazkian, goizeko piketea Itzubaltzeta / Romon.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun