Herritarren eskubide nahia eta agintarien ezetza talka egin dute gaurko greba egunean

Uribe Kosta eta Erandion ere bi irudi argi utzi ditu ELA, LAB, ESK, STEE-EILAS, EHNE, HIRU, CNT eta CGT sindikatuek eta hainbat gizarte eragilek Hego Euskal Herrian deitutako greba orokorrak. Batetik, goizean goizetik kalera ateraz, eskubide sozial eta laboral duinak aldarrikatu dituzte dozenaka herritarrek; murrizketa, erreforma eta inposizioak salatzearekin batera. Goizeko piketeetan banketxeak eta supermerkatuak izan dituzte helburu, merkatari txikiei babesa eskainiz. Hain zuzen ere, herritarrok tokian tokiko saltokietan kontsumitzea dute helburu, herrietako ekonomia suspertzeko. Bestetik, gaurko mobilizazioei agintariek emandako erantzuna agerian geratu da. Itzubaltzeta / Romon gertatutakoa horren adibide. Birritan, bata Romo-Artatza institutuan eta bestea Areetako Lanbideren bulegoan, oldartu zaizkie herritarrei ertzainek; zaurituak eraginez eta hainbat lagun identifikatuz. Horietako bati, gutxienez, salaketa jarri diote, "irainak" leporatuta. Argazkian, ertzainak Areetan atzemandako gaztea oratzen.