Poliziaren arabera, salatutako ekintza guztiak antzeko modus operandi-a erabiliz egin ziren eta gertaeren egilearen ezaugarri fisikoak bat zetozen. Jazarleak 11 eta 15 urte bitarteko neska uniformedunak erasotzen zituen kalean, normalean, goizean goiz, autobus geltokian edo ikastetxerako bidean zeudenean. "Lehenengo, arreta pizten zien, telefono mugikor bateko pantaila erakutsiz, non gizonen genitalen irudiak agertzen ziren. Gero, kasu batzuetan, ukitze sexualak egitera iristen zen, haiek ihes egin baino lehen", ertzainek azaldu dutenez.
Salatzaileek emandako informazioaz, Ertzaintzako Polizia Zientifikoko Unitateak erretratu robot bat egin zuen eta ikastetxe, autobus geltoki eta gertaerak jazotako lekuen inguruetan kalez jantzitako ertzainez osatutako zaintza-dispositiboak ezarri ziren, betiere eragindako herrietako udaltzaingoekin elkarlanean eta inguruko ikastetxeetako arduradunen laguntzaz.
Ostegun goizean, aipatutako dispositiboa osatzen zuten ertzainek susmagarria atxilotu ahal izan zuten, Areetan ikastetxeko autobusaren geltokian zain zegoen neska gazte batengana hurbildu eta hari gona altxatu zionean. Patruilak gelditzeko agintzean, ihes egiten eta irudiak gordetzen zituen telefonoaz libratzen ahalegindu zen, bertsio polizialaren arabera. Beraz, jazarraldi labur baten ondoren harrapatu zuten.
Udaltzaingoko kide batek berreskuratu zuen telefonoa eta, handik gertu zegoen susmagarriaren autoan ertzainek telefonokoaren antzeko beste grabaketa pornografiko bat gordetzen zuen argazki kamera bat aurkitu ei zuten. Atxilotuak haur-pornografia delituagatiko aurrekariak omen dauzka eta Ertzaintzaren herri horretako bulegoetara eraman zuten, beharrezko eginbideak egiteko. Epaileen aurrera eramanda, magistratuak eguerdian agindu du espetxeratzea.
Bestalde, Ertzaintzak dispositiboan parte hartu duten udaltzaingoen laguntza eskertu du, baita polizia-lana erraztu duten aita, ama eta ikastetxeetako arduradunen diskrezioa eta elkarlana ere.
Atzo goizean Getxo udalerriko Areeta auzoan Ertzaintzak atxilotu zuen ustezko pedofiloa dagoeneko espetxean dago, eguerdian epailearen aurretik igaro ostean. Eusko Jaurlaritzako Segurtasun Sailak zabaldu duenez, Ertzaintzak 54 urteko gizona harrapatu zuen "in fraganti" atzo Areetan, "neska adingabe bati ikastetxeko autobusaren geltokian erasotzen ari zela". Gainera, Polizia autonomikoak delituzko antzeko hogei bat jarduera gehiago leporatzen dizkio. Ertzaintzak martxoaren hasieran jaso zuen eskola-umeen kontrako lehenengo sexu gehiegikeriaren berri. Era berean, eraso saioen salaketak jaso zituen eta, ondorengo asteetan, beste kasu batzuk ere gertatu ziren, nagusiki, Leioa eta Getxo udalerrietan. Hori dela eta ikerketa abiatu zuten Leioa eta Getxoko udaltzainekin batera. Guztira, sexu askatasunaren aurkako hogei bat ekintza leporatzen dizkiote ustezko erasotzaileari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun