Hilabeteko Azken Ostirala hartuko dute gaur Euskal Herrian 200 herrik baino gehiagok. Preso eta iheslarien eskubideen aldeko ekimen hori Etxerat elkarteak abiatu zuen eta egun Herrirak eta herri bilguneek dinamizatzen dute, baita Uribe Kostan ere. Leioan, bulebarreko ohiko elkarretaratzea egingo dute 20:00etan. Ostean, "Leioa-Daroca konexioa" leopeko korrikaldia antolatu du Leioako Herrirak, Leioako pasealekuari birak emanez, Zaragozako Daroca espetxean preso dagoen Pagoa Zulueta auzokideraino dituzten 402 kilometroak erditik kendu nahian. Algortan, Itzubaltzeta / Romon, Sopelan, Berangon eta Urdulizen ordu berean egingo dituzte elkarretaratzeak Telletxe plazan, Xake plazan, Udaletxe plazan, frontoian eta metro geltokiaren ondoan, hurrenez hurren. Urdulizko Herrirak Tou musika taldearen emanaldia antolatu du elkarretaratzearen ostean, herriko tabernan. Itzubaltzetan, ordea, Erromoko Kantuzaleok taldeak kantu emanaldia eskainiko du Branka, Gure Etxea, Museo, Josu Rosen eta "Txiskales"-en tabernetan, Herrirarekin bat eginez. Erandion, Plentzian eta Lemoizen ere izango dira presoen aldeko mobilizazioak. Argazkian, Jone Ibarretxe eta Antton Goikoetxea, Tou / © Samuel Goirigolzarri.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun